ოსკაროსანი მსახიობი ზოი სალდანა ოფიციალურად გახდა ყველა დროის ყველაზე შემოსავლიანი მსახიობი. რეკორდი მას ჯეიმს კამერონის ახალი ფილმში Avatar: Fire and Ash მონაწილეობამ მოუტანა. საერთო ჯამში, ზოი სალდანას მონაწილეობით გადაღებულმა ფილმებმა 15.47 მილიარდ დოლარზე მეტი შემოსავალი დააგროვა.

სალდანა თამაშობს ისტორიაში ყველაზე შემოსავლიან სამივე ფილმში:

  • Avatar
  • Avengers: Endgame
  • Avatar: The Way of Water

ის ასევე პირველი მსახიობია, რომელმაც იმ ოთხ ფილმში ითამაშა, რომლებისგანაც თითოეულმა $2 მილიარდზე მეტი მოაგროვა (მათ შორის, Avengers: Infinity War). 2024 წლის მონაცემებით, სკარლეტ იოჰანსონისა და სემუელ ლ. ჯექსონის შემდეგ, მესამე ადგილზე იყო, თუმცა Fire and Ash-მა ყველაფერი შეცვალა.

Avatar-ისა და მარველის კინემატოგრაფიულ სამყაროში გამორას როლის შესრულების გარდა (მან ითამაშა Guardians of the Galaxy-ს სამივე ფილმში), სალდანამ ასევე განასახიერა ნიოტა უჰურა Star Trek-ის ტრილოგიაში, რომელმაც საერთო ჯამში მილიარდ დოლარზე მეტი გამოიმუშავა.

მსახიობმა ინსტაგრამზე ვიდეო გამოაქვეყნა, სადაც ყველას მადლობას უხდის.

"მინდა გულწრფელად გამოვხატო ჩემი უდიდესი მადლიერება ამ საოცარი გზისთვის, რომელმაც დღეს ყველა დროის ყველაზე შემოსავლიანი მსახიობი გამხადა", — თქვა მან — "ეს მიღწევა შესაძლებელი გახდა იმ დაუჯერებელი ფრენჩაიზებისა და კოლაბორაციების წყალობით, რომელთა ნაწილიც, გამიმართლა რომ ვყოფილიყავი".

2025 წელი სალდანასთვის განსაკუთრებული აღმოჩნდა: მარტში მან მოიგო ოსკარი ფილმში Emilia Pérez შესრულებული მეორეხარისხოვანი როლისთვის და გახდა პირველი დომინიკელ-ამერიკელი, რომელმაც აკადემიის ჯილდო მიიღო. ჟაკ ოდიარის თამამმა მუსიკალურმა ფილმმა სალდანას ჯილდოები მოუტანა კანის კინოფესტივალზე, სადაც ფილმის პრემიერა შედგა, და ასევე დაჯილდოების სეზონზე სრული ტრიუმფი განიცადა — მათ შორის SAG-ის, BAFTA-ს, Golden Globe-ისა და Critics Choice-ის ჯილდოები.

"ძალიან სასიამოვნო შეგრძნებაა", — უთხრა სალდანამ Variety-ს ცოტა ხნის წინ "ოსკარის მფლობელის" სტატუსზე საუბრისას — "ჩემი ქმარი ძალიან ხუმარაა. მას აქვს ასეთი ხუმრობა: 'ზოი, ახლა ვეღარაფერს გააკეთებ ისე, რომ არ წარგადგინონ როგორც "ოსკარის მფლობელი". ბანკსაც ვერ გაძარცვავ, სათაური იქნება: "ოსკარის მფლობელი…"

სალდანა, სავარაუდოდ, დაბრუნდება Avatar 4-შიც, რომლის გამოსვლაც 2029 წლის დეკემბერშია დაგეგმილი, და Avatar 5-შიც, რომელიც 2031 წლის დეკემბერში უნდა გამოვიდეს, ასე რომ, მისი სალარო შემოსავლები, დიდი ალბათობით, კიდევ გაიზრდება.

ასევე ნახეთ:

Avatar: Fire and Ash-ის შემოსავალმა 1 მილიარდს გადააჭარბა