ბრიტანული დაზვერვის, MI6-ის შეფმა, ბლეიზ მეტრეველმა თანამდებობაზე დანიშვნის შემდეგ, პირველი სიტყვით გამოსვლისას რუსეთ-უკრაინის ომსა და რუსეთის მხრიდან სისტემატურ ქაოსზე ისაუბრა და დასძინა, რომ სანამ ვლადიმერ პუტინი იძულებული არ გახდება, ის მანამდე რიტორიკას არ შეცვლის.

MI6-ის შეფმა, როგორც გუშინ The Guardian წერდა, მხარდაჭერა გამოუცხადა უკრაინას და თქვა, რომ პუტინს ეჭვი არ უნდა ეპარებოდეს: მათი მხარდაჭერა უკრაინის მიმართ ურყევია.

"ჩვენ ყველანი კვლავ ვდგავართ აგრესიული, ექსპანსიონისტური და რევიზიონისტული რუსეთის საფრთხის წინაშე, რომელიც ცდილობს უკრაინის დამორჩილებას და NATO-ს შევიწროებას. ჩემთვის შემზარავია, რომ ასობით ათასი ადამიანი დაიღუპა და მსხვერპლის რაოდენობა ყოველდღიურად იზრდება პუტინის მიერ ისტორიის დამახინჯებისა და პატივისცემის მოპოვების მიერ კომპრომეტირებული სურვილის გამო. ის აჭიანურებს მოლაპარაკებებს და ომის სიმძიმეს საკუთარ მოსახლეობას აკისრებს. თუმცა, პუტინს ეჭვი არ უნდა ეპარებოდეს: ჩვენი მხარდაჭერა ურყევია. გამომფიტავი ომის პარალელურად, რუსეთის გვცდის "ნაცრისფერ ზონაში" ისეთი ტაქტიკებით, რომლებიც ომის ზღვარს მცირედით ჩამოუვარდება. მნიშვნელოვანია, გავაცნობიეროთ მათი მცდელობები შიშის დათესვისა და მანიპულაციის კუთხით, რადგან ეს თითოეულ ჩვენგანს ეხება. ვგულისხმობ კიბერშეტევებს, დრონებს, აგრესიულ ქმედებებს ჩვენს წყლებში — როგორც ზედაპირზე, ისე სიღრმეში. სახელმწიფოს მიერ მართულ საბოტაჟსა და განზრახ ხანძრებს, პროპაგანდასა და ზეგავლენის ოპერაციებს, რომლებიც აღრმავებენ და სათავისოდ იყენებენ საზოგადოებაში არსებულ ბზარებს. ქაოსის ექსპორტი საერთაშორისო ურთიერთობებისადმი რუსული მიდგომის მახასიათებელია და არა ტექნიკური ხარვეზი. ჩვენ მზად უნდა ვიყოთ, რომ ეს გაგრძელდება მანამ, სანამ პუტინი არ იქნება იძულებული, შეცვალოს საკუთარი კალკულაციები. ხელოვნური ინტელექტით აღჭურვილი რობოტები და დრონები ბრწყინვალეა მასშტაბური წარმოებისთვის, თუმცა გამანადგურებელია ბრძოლის ველზე. აღმოჩენებმა, რომლებიც დაავადებებს კურნავს, შესაძლოა ახალი იარაღის შექმნასაც შეუწყოს ხელი. და სანამ სახელმწიფოები ტექნოლოგიური უპირატესობისთვის იბრძვიან, ან როდესაც ცალკეული ალგორითმები სახელმწიფოებზე მძლავრი ხდება, ეს ჰიპერ-პერსონალიზებული ინსტრუმენტები შესაძლოა კონფლიქტისა და კონტროლის ახალ ვექტორად იქცეს," — განაცხადა მეტრეველმა. (თარგმანი ნეტგაზეთი)

მანამდე, The Guardian-მა გამოაქვეყნა სტატია, სადაც ბლეიზ მეტრეველის სიტყვის გამოსვლის დეტალებზე წერდა.

47 წლის ბლეიზ მეტრეველი პირველი ქალია, რომელიც ბრიტანეთის საგარეო დაზვერვას ხელმძღვანელობს. ის ამ თანამდებობაზე 2025 წლის ივნისში დაინიშნა და ამ პოსტზე მან სერ რიჩარდ მური შეცვალა. მანამდე მეტრეველი სხვა დირექტორის დონის თანამდებობებს იკავებდა ბრიტანეთის სადაზვერვო სამსახურში (MI6), შიდა უსაფრთხოებისა და კონტრდაზვერვის სააგენტო MI5-ში.