საქართველოს მართლმადიდებელი ეკლესიის საპატრიარქოში სინოდის სხდომა რამდენიმე წუთის წინ დასრულდა. სხდომიდან გამოსულმა სასულიერო პირებმა ჟურნალისტებთან განხილულ საკითხებზე არ ისაუბრეს.

"დღეს ჩატარებული წმინდა სინოდის სხდომა არის წინგადადგმული პოზიტიური ნაბიჯი საქართველოს ეკლესიისთვის", - განაცხადა მეუფე პეტრემ სხდომის დასრულების შემდეგ.

სინოდის სხდომა ე.წ. ციანიდის საქმეზე გადაწყვეტილების გამოტანის შემდეგ პირველად გაიმართა. ციანიდის საქმეზე სასამართლომ დეკანოზ გიორგი მამალაძე პატრიარქის მდივან-რეფერენტის, შორენა თეთრუაშვილის მკვლელობის მომზადებისა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა.