ცენტრ პოინტის სამეთვალყურეო საბჭოს თავმჯდომარე, გუკა რჩეულიშვილი ამბობს, რომ კომპანიის ყიდვის სურვილი კომპანია m2-ს აქვს. მისი თქმით, ამ სიტუაციაში ეს ერთადერთი გამოსავალია და უკეთესი პირობების შეთავაზება არავის შეუძლია.

"შევთავაზეთ დაზარალებულებს გამოსავალი. ახლა მათი გადასაწყვეტია, თანახმა არიან თუ არა ამ გამოსავალზე. დაზარალებულებზეა დამოკიდებული, m2-თან მოლაპარაკებებს ვაგრძელებთ, თუ არა", - თქვა რჩეულიშილმა.

კომპანიის წილების გაყიდვებზე მოლაპარაკების დასრულებაზე რჩეულიშვილმა On.ge-ს 28 სექტემბერს განუცხადა.

ცენტრ პოინტის საქმეზე რუსუდან კერვალიშვილსა და მის დას, მაია რჩეულიშვილს თბილისის საქალაქო სასამართლომ ოთხი წლით თავისუფლების აღკვეთა მიუსაჯა. ამავე საქმეზე იყო დაკავებული გუკა რჩეულიშვილიც, რომელსაც სასამართლომ მოგვიანებით აღკვეთის ღონისძიებად გირაო შეუფარდა.

კერვალიშვილისა და რჩეულიშვილისთვის ბრალის მისჯის დროს პროკურატურა აცხადებდა, რომ როგორც გამოძიების ეტაპზე, ისე საქმის სასამართლოში განხილვისას ბრალდებულებთან გააფორმებდა საპროცესო შეთანხმებას პირობით მსჯავრზე თუ 6 000-მდე დაზარალებულს მიყენებული ზიანი სრულად აუნაზღაურდებოდათ.