"კალაძე არის აგონიაში და აგონიაში მყოფი ადამიანები სჩადიან ასეთ შეცდომებს", — ლელო ძლიერი საქართველოს ერთ-ერთი წევრი, ალეკო ელისაშვილი 8 სექტემბერს კახა კალაძის საარჩევნო შტაბთან მისივე შტაბის წევრების და ქართული ოცნების მხარდამჭერების მიერ მოქალაქეებზე განხორციელებულ ძალადობას ეხმაურება.

მისი თქმით, "ეს იყო მავნებლობა, ეს იყო შეცდომა, ეს იყო ორგანიზებული თავდასხმა".

"კალაძე არის აგონიაში და აგონიაში მყოფი ადამიანები სჩადიან ასეთ შეცდომებს იმიტომ, რომ ეს იყო მავნებლობა, ეს იყო შეცდომა, ეს იყო ორგანიზებული თავდასხმა. რა გააკეთოს კალაძემ, არ იცის, იმიტომ, რომ მოქალაქეებთან სალაპარაკო პირი არ აქვს. 8 წლის განმავლობაში თბილისელები აბსოლუტურად ყველაფერში გადააგდო, რასაც დაჰპირდა მოატყუა.

ძალადობაზე გადადიხარ მაშინ, როცა სალაპარაკო, არგუმენტი არაფერი გაქვს. გუშინ, რაც მოხდა, სისხლის სამართლის დანაშაულია. ვიხილეთ ქალებზე თავდასხმა, ჟურნალისტებზე თავდასხმა. ხელის შეშლა, ტელეფონების წართმევა, ეს ყველაფერი სისხლის სამართლის დანაშაულია და პოლიციელებზე თავდასხმა ქართული ოცნების ვიღაც იდიოტის, "ტიტუშკების" მიერ. პოლიციელებს ურახუნებდნენ თავში. რამდენიმე პოლიტპატიმარი ციხეში იმის გამო ზის, რომ ქაღალდი და მუყაოს ჭიქა ისროლეს და ამათმა თავში ურახუნეს ბოთლები პოლიციელებს და ვითომ არაფერია! აგონიაში არიან და განსაკუთრებით ეს ამაზრზენი კალაძე, რომელიც მართლა ქალივით დადის და პლასტიკური ქირურგიის კაბინეტიდან არ გამოდის, ბოტოქსს ბოტოქსზე და ფილერებს რომ იკეთებს, ამბობს, ქალებს სად ხედავთო. რა ქალებს სად ხედავთ, ორი თვალი არ აქვს? რაღაცაზე, რომ ვითომ პრეტენზიები აქვთ ამ გულისამრევებს, რომ კაცობენ და ვითომ ტიპობენ, ქალს რომ ხელს დაარტყამ, ეს არის კაცობა? სად გაიზარდნენ!", — განაცხადა ელისაშვილმა.