Figma-მ (FIG) საფონდო ბირჟაზე აქციებით ვაჭრობა გუშინ, 31 ივლისს დაიწყო და წარმატებული სტარტიც გამოუვიდა. IPO-ს დღესვე კომპანიამ აქციების საწყის ფასს (33 დოლარი ერთ აქციაზე) სამჯერ გადააჭარბა. ამჟამად მისი საბაზრო კაპიტალიზაცია 57.769 მილიარდ დოლარად არის შეფასებული.

IPO (Initial Public offering) კომპანიის მხრიდან ინვესტორებისთვის ფასიანი ქაღალდების პირველადი საჯარო შეთავაზებაა. ეს მაშინ ხდება, როდესაც კერძო ფირმა საჯარო ხდება და საკუთარი აქციები გასაყიდად გამოაქვს.

Figma პროგრამული უზრუნველყოფის კომპანიაა, რომელიც ვებსაიტებისა და აპლიკაციების დიზაინისთვის ონლაინ ინსტრუმენტებს ქმნის. მისი მთავარი პროდუქტი, ასევე სახელად Figma, საშუალებას აძლევს დიზაინერებს და დეველოპერებს ერთდროულად იმუშაონ ვიზუალურ პროექტებზე რეალურ დროში. ეს პლატფორმა ხშირად გამოიყენება UI/UX დიზაინში და არის ერთ-ერთი წამყვანი ინსტრუმენტი თანამედროვე ციფრულ დიზაინში.

როგორც ცნობილია, ჯერ კიდევ 2022 წელს Adobe ამ კომპანიის შესყიდვას 20 მილიარდ დოლარად აპირებდა. მაშინ ეს გარიგება არ შედგა და შესაბამისად შეთანხმებაც გაუქმდა. ახლა კი კომპანიის საბაზრო ღირებულება აღნიშნულ თანხას თითქმის სამჯერ აღემატება. ოფიციალური მონაცემებით, Figma-მ მიმდინარე წლის პირველ კვარტალში 228,2 მილიონი დოლარის შემოსავალი მიიღო, საიდანაც წმინდა მოგება 44,9 მილიონი იყო — წლიური ზრდა 46%-ია.

Figma-მ და მისმა აქციონერებმა პირველივე სავაჭრო დღეს 37 მილიონი აქცია გაყიდეს, რის სანაცვლოდაც დაახლოებით 4,3 მილიარდი დოლარი მიიღეს. კომპანიას აქციის საწყის ფასად 30-დან 32 დოლარამდე ჰქონდა განსაზღვრული, რაც მანამდე არსებულ პროგნოზზე 25-28 დოლარზე მეტიც იყო, თუმცა საბოლოოდ ერთი აქციის პირველად ფასად 33 დოლარი დადგინდა.

აღსანიშნავია, რომ საფონდო ბირჟაზე Figma-ს გამოჩენამდე წარმატებული IPO გამოაცხადეს ფინტექ კომპანია Circle-მა და ონლაინ სავაჭრო პლატფორმა eToro-მაც.

ამ და სხვა კომპანიების ფასიანი ქაღალდების შეძენა თიბისის მობაილბანკში შეგიძლია. გახსენი საინვესტიციო ანგარიში და შეიძინე ამერიკული აქციები და ფონდები საკომისიოს გარეშე. გაითვალისწინე, რომ ეს არ არის ფინანსური რჩევა.