ოკუპირებულ ცხინვალში სტალინის ძეგლს ჩაქუჩით სახე დაუზიანეს. ამის შესახებ ინფორმაციას ადგილობრივი მედია ავრცელებს.

ცხინვალის პურის ქარხნის თანამშრომლებმა ქარხნის მახლობლად, ხარებოვის ქუჩაზე მდებარე იოსებ სტალინის დაზიანებული ძეგლი აღმოაჩინეს. საბჭოთა ლიდერის სახე ფაქტობრივად დამსხვრეულია.

ადგილობრივი მედიის წყაროს ინფორმაციით, 22 ივლისს ქარხანაში სამი კაპიუშონიანი მამაკაცი მივიდა. ერთ-ერთმა მათგანმა ჩაქუჩი დაარტყა ბიუსტს, დაზიანდა სტალინის ცხვირი და თვალი. მარიონეტული რეჟიმის სამართალდამცავი ორგანოები ამჟამად დამნაშავეებს ეძებენ.

ცნობისთვის, სტალინის ძეგლი დაახლოებით ერთი თვის წინ, 21 ივნისს დაიდგა. მისი დადგმის იდეა ეკუთვნის პურის ქარხნის ხელმძღვანელს.