ცნობილი ესპანელი კინორეჟისორი პედრო ალმოდოვარი ამბობს, რომ აშშ-ის პრეზიდენტი დონალდ ტრამპი ისტორიაში "ჩვენი დროის უდიდესი შეცდომის" სახელით შევა. ნიუ-იორკში, ლინკოლნის ცენტრში, ალმოდოვარს სულ ახლახან გადაეცა ჩაპლინის ჯილდო. თავის სამადლობელ სიტყვაში რეჟისორმა აღნიშნა, რომ აშშ-ში ჩასვლამდე ორჭოფობდა. ვფიქრობდი, რამდენად მართებული იქნებოდა ვიზიტი იმ ქვეყანაში, რომლის "ნარცისი მმართველი" ადამიანის უფლებებს პატივს არ სცემსო.

"ტრამპი და მისი მეგობრები, მილიონერები და ოლიგარქები, ვერაფრით დაგვაჯერებენ, რომ ჩვენი თვალით დანახული რეალობა განსხვავდება იმისგან, სადაც ვცხოვრობთ — როგორც უნდა თამაშობდნენ სიტყვებით და გვარწმუნებდნენ, რომ თავიანთი ნამოქმედარისგან განსხვავებული განზრახვა აქვთ. მიგრანტები დამნაშავეები არ არიან. დამნაშავეა რუსეთი, რომელიც უკრაინაში შეიჭრა.

"ბატონო ტრამპ, თქვენ მოგმართავთ და, ვიმედოვნებ, გესმით, რასაც ვამბობ. ისტორიაში თქვენ ჩვენი დროის უდიდესი შეცდომის სახელით შეხვალთ. თქვენი უგუნურება მხოლოდ თქვენსავე ძალმომრეობას თუ გაუტოლდება. ისტორიას კაცობრიობისთვის მიყენებულ ერთ-ერთ უდიდეს ზიანად შემორჩებით. ისტორიას კატასტროფის სახელით შემორჩებით".

ალმოდოვარმა, რომელიც თავის შემოქმედებაში ხშირად შეეხება ლგბტქ საკითხებს, სამადლობელ სიტყვაში ტრამპის ტრანსფობიურ რიტორიკაზეც გაამახვილა ყურადღება. ქვიარ რეჟისორმა გაიხსენა ფრანკოს დიქტატურის ქვეშ გატარებული ბავშვობა და თქვა, რომ იმ პერიოდში ფილმები მისთვის თავშესაფრად იქცა. მოგვიანებით კი, გვიანდელი 1970-იანი წლებიდან, როცა ესპანეთში ფაშისტური რეჟიმი დაემხო, თავადაც მიეცა ფილმების გადაღების საშუალება.

"სიტყვებით ვერ გადმოგცემთ, რას ნიშნავდა ამ უსაზღვრო თავისუფლების შეგრძნება ახალგაზრდა ადამიანისთვის, რომელსაც ფილმების გადაღება სურდა", — თქვა ალმოდოვარმა.

ნახევარსაუკუნოვანი კარიერის განმავლობაში პედრო ალმოდოვარმა უსაზღვრო წარმატებასაც მიაღწია. რეჟისორის სახელზე ოსკარი, ორი ოქროს გლობუსი და კიდევ არაერთი პრესტიჟული ჯილდოა. მისი ამ დროისთვის ბოლო ნამუშევარია შარშან გამოსული The Room Next Door ("ოთახი მეზობლად"), სადაც მთავარი როლები ჯულიან მურმა და ტილდა სუინტონმა შეასრულეს. ამ ფილმმა, რომელიც ალმოდოვარისთვის პირველი სრულმეტრაჟიანი ინგლისურენოვანი ნამუშევარია, ესპანეთის კინოაკადემიის "გოიას" დაჯილდოებაზე სამ ნომინაციაში გაიმარჯვა.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...