ლედი გაგა თანამედროვე მუსიკის ინდუსტრიის ეიჯისტურ ტენდენციებს უსვამს ხაზს და ამბობს, რომ "ჯერ მხოლოდ ხურდება". პოპვარსკვლავმა სულ ახლახან iHeartRadio-ის ჯილდო მიიღო განსაკუთრებული კარიერული მიღწევისთვის. სამადლობელ სიტყვაში გაგამ ირონიულად აღნიშნა, რომ თავის ასაკში ასეთი ჯილდო რთულად მისაღებია.

"საკმაოდ მიჭირს იმ ფაქტის აღქმა, რომ 38 წლის ასაკში მთელი ჩემი კარიერის შემაჯამებელ ჯილდოს ვიღებ", — თქვა მუსიკოსმა ცერემონიაზე, — "ერთი მხრივ, ასე მგონია, რომ მთელი ცხოვრებაა, ამ საქმეს ვაკეთებ, მეორე მხრივ კი, ზუსტად ვიცი, ეს მხოლოდ დასაწყისია. ასე რომ, შეიძლება მსოფლიო 40 წელს მიახლოებულ ქალს პოპვარსკვლავობისთვის ხნიერად მიიჩნევდეს — რაც არანორმალურია — თუმცა, გარწმუნებთ, ჯერ მხოლოდ ვხურდები".

iHeartRadio-ის განცხადებით კი, გაგა ერთ-ერთია იმ სულ რამდენიმე თანამედროვე არტისტიდან, რომლებსაც რისკიანმა ნაბიჯებმა ასეთი წარმატება მოუტანა და ჯილდოც სწორედ ამისთვის გადაეცა. "იგი თანამედროვე ხელოვნებაში ნამდვილი ინოვატორია", — ამატებს რადიოპლატფორმა. თუმცა, თავად გაგა ინოვატორობას სხვაგვარად განმარტავდა...

"ინოვაცია წესების დარღვევას არ ნიშნავს", — აცხადებს მომღერალი, — "ესაა საკუთარი წესების შექმნა და მერე მსოფლიოს დარწმუნება, რომ ეს წესები ყოველთვის მათი იყო".

სულ ორიოდე კვირის წინ, გაგამ თავისი ახალი, რიგით მეშვიდე სოლო სტუდიური ალბომი გამოუშვა. ალბომი, სახელწოდებით Mayhem, 14 სიმღერას აერთიანებს, მათ შორის, ბრუნო მარსთან ჩაწერილ დუეტს Die with a Smile, რომელმაც მუსიკოსებს გრემის ჯილდო მოუტანა. Mayhem კი გამოსვლისთანავე Billboard-ის ჩარტის სათავეში აღმოჩნდა.

რაც შეეხება iHeartRadio-ის დაჯილდოებას, ცერემონიაზე გამოსვლისას გაგამ ასევე მადლობა გადაუხადა თავის საქმროს, მაიკლ პოლანსკის (რომელთან ერთადაც ახალ ალბომზე იმუშავა), ლგბტქ ადამიანებსა და ოჯახს. მუსიკოსი თავის მისაბაძ მაგალითებად ბებიებს ასახელებს და ამბობს, რომ მისთვის ისინი ყველაზე დიდი ინოვატორები იყვნენ.

"ყოველთვის, როცა ოთახში ერთადერთი ქალი აღმოვჩნდებოდი ხოლმე, შინაგანი ხმა ომახიანად მიკარნახებდა, კომპრომისზე არ წავსულიყავი", — ამბობს მომღერალი, — "ამ ხმის მოსმენა ყოველთვის მიჩვენებდა, სად იყო ჩემი ადგილი. და დღეს მე ვიხსენებ ჩემს ბებიებს, შესანიშნავ იტალიელ ამერიკელ ქალებს, რომლებმაც ბედისწერა მხოლოდ საკუთარი ძლიერებით, ოცნებებითა და მიზანსწრაფულობით შეცვალეს. მათ არც ახალი ტექნოლოგია შეუქმნიათ და არც ხელოვნების შედევრი, მაგრამ შექმნეს პერსპექტივა და მხოლოდ თავიანთი საზრიანობით აიშენეს მომავალი. ეს ქალები, ჩემი წინაპრები, ჩემთვის ყველაზე დიდი ინოვატორები არიან".

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...