საერთაშორისო გამჭვირვალობა — საქართველოს ცნობით, საჯარო რეესტრის სააგენტომ საჯარო მოსამსახურეთა დამოუკიდებელ პროფესიულ კავშირს, სახელწოდებით "კონსტიტუციის 78-ე მუხლი", რეგისტრაციაზე უარი განუცხადა.

TI-ის განცხადებაში ვკითხულობთ, რომ 2024 წლის ნოემბერში 20-მდე სხვადასხვა სახელმწიფო და საჯარო დაწესებულების წარმომადგენლებმა საინიციატივო ჯგუფი შექმნეს, რომლის მიზანიც საჯარო მოსამსახურეთა პროფესიული კავშირის დაფუძნება იყო. შესაბამისად 2024 წლის დეკემბერში დაფუძნდა "საჯარო მოსამსახურეთა დამოუკიდებელ პროფესიული კავშირი — კონსტიტუციის 78-ე მუხლი".

"2024 წლის 25 დეკემბერს საჯარო რეესტრის სააგენტოს რეგისტრაციის მოთხოვნით განცხადებით მიმართა ზემოაღნიშნული პროფკავშირის 36-მა დამფუძნებელმა. ამასთან, საჯარო რეესტრში წარდგენილი იქნა რეგისტრაციისთვის საჭირო ყველა დოკუმენტი, კერძოდ, პროფესიული კავშირის სადამფუძნებლო შეთანხმება და წესდება.

საგულისხმოა, რომ პროფესიული კავშირის რამდენიმე დამფუძნებლი ამავდროულად არის საჯარო რეესტრის მოქმედი და ყოფილი თანამშრომელი, რომლებსაც ამ სამსახურში მუშაობის ხანგრძლივი გამოცდილება აქვთ და ზუსტად იციან, რა დოკუმენტაცია უნდა წარედგინათ პროფესიული კავშირის რეგისტრაციის მიზნით.

ამის მიუხედავად, საჯარო რეესტრმა, სადამფუძნებლო კრების ოქმის წარდგენის საბაბით, 2024 წლის 26 დეკემბერს შეაჩერა სარეგისტრაციო წარმოება. მიუხედავად იმისა, რომ მოთხოვნა შესრულებულ იქნა, საჯარო რეესტრმა კიდევ რამდენჯერმე განაცხადა უარი სარეგისტრაციო წარმოების განახლებაზე. 2025 წლის 28 იანვარს კი საჯარო რეესტრის სააგენტომ მიიღო გადაწყვეტილება სარეგისტრაციო წარმოების შეწყვეტის შესახებ

იმისათვის, რომ საბოლოოდ დარწმუნებულიყო საჯარო რეესტრის მიკერძოებულ, დისკრიმინაციულ და არაკეთილსინიდიერ დამოკიდებულებაში საჯარო მოსამსახურეთა პროფკავშირის მიმართ, საჯარო მოხელეთა პროფკავშირმა 2025 წლის 18 თებერვალს, რეგისტრაციის მოთხოვნით, ხელახალი განცხადება შეიტანა საჯარო რეესტრში. თუმცა, საჯარო რეესტრმა ამჯერადაც შეაჩერა სარეგისტრაციო წარმოება. ამჯერად პროფკავშირს სახელწოდება დაუწუნეს.

აშკარაა, რომ „ქართულ ოცნებას“ ძალიან აშინებს საჯარო მოსამსახურეთა დამოუკიდებელი პროფკავშირის შექმნა, რადგან მისი არსებობა წინააღმდეგობაშია „ქართული ოცნების“ მიზანთან, პოლიტიკურად ნეიტრალური და პროფესიული საჯარო სამსახურის ნაცვლად, საქართველოში შექმნას ხელისუფლების უკანონო დავალებების უსიტყვო შემსრულებელი, პოლიტიკური ხელმძღვანელობის მონა-მორჩილი საჯარო სამსახური", — ვკითხულობთ განცხადებაში.

გამჭვირვალობის ცნობით, დღეისათვის, დაუზუსტებელი მონაცემებით, საჯარო სამსახურიდან უკვე გაათავისუფლეს, დაახლოებით, 400 პირი.