აშშ-ის საპრეზიდენტო არჩევნებში დონალდ ტრამპის გამარჯვების შემდეგ, დისტოპიურ ლიტერატურაზე მოთხოვნა იზრდება. სულ რაღაც ერთ დღეში, წიგნები დემოკრატიაზე, ტირანიაზე, ფემინიზმსა და ულტრამემარჯვენე პოლიტიკაზე, ბესტსელერების სიაში მოწინავე ადგილებზე აღმოჩნდა.

მაგალითისთვის, კანადელი მწერლის, მარგარეტ ეტვუდის დისტოპიური რომანი მხევლის წიგნი, რომელიც ტოტალიტარულ საზოგადოებაში მცხოვრები ქალების უუფლებობაზე გვიყვება, თითქმის 400 პოზიციით დაწინაურდა და ამაზონის ბესტსელერების სიაში მე-3 ადგილი დაიკავა.

თვალშისაცემია სხვა წიგნების გაყიდვების მატებაც. ისტორიკოს ტიმოთი სნაიდერის წიგნი ტირანიაზე ბესტსელერების ჩამონათვალში მე-8 პოზიციას იკავებს. სიაში დაწინაურების შემდეგ, მე-16 ადგილზეა ჯორჯ ორუელის გახმაურებული დისტოპია 1984.

სემი სეიჯისა და ემილი ემიკის წიგნი დემოკრატია რეტროგრადში კი ყველაზე დიდი მატებით გამოირჩევა: 24 საათში წიგნის გაყიდვები 30 000%-ით გაიზარდა.

მოიმატა ფემინისტური ლიტერატურით დაინტერესებამაც. რებეკა სოლნიტის 2014 წელს გამოქვეყნებული ესეების კრებული, კაცები მიხსნიან, ერთ დღეში 40 ათასი პოზიციით დაწინაურდა.

ორი ათასი პოზიციით დაწინაურდა არჩევნებში დამარცხებული კამალა ჰარისის ავტობიოგრაფიული წიგნიც. პოპულარობას ინარჩუნებს არჩეული პრეზიდენტის ცოლის, მელანია ტრამპის, და არჩეული ვიცე-პრეზიდენტის, ჯეიდი ვენსის, მემუარებიც.

ფოტო: Shutterstock

2024 წლის აშშ-ის საპრეზიდენტო არჩევნები რესპუბლიკელი დონალდ ტრამპის გამარჯვებით დასრულდა. ქვეყნის რიგით 47-ე პრეზიდენტის ინაუგურაცია 2025 წლის იანვარში შედგება.

ტრამპის გამარჯვებას უარყოფითი რეაქცია მოჰყვა ცნობილი ადამიანების დიდ ნაწილში. "ეს ომია ქალების წინააღმდეგ" — დაწერა ინსტაგრამზე ამერიკელმა პოპვარსკვლავმა ბილი აილიშმა.

ასევე იხილეთ:

თუ წიგნების კითხვა და მათი განხილვა არასდროს გბეზრდება, შემოგვიერთდი ჯგუფში ერთი გვერდიც და...