გირჩი 2017 წლის თვითმმართველობის არჩევნებში მონაწილეობას არ მიიღებს. პარტიამ ეს გადაწყვეტილება მას მერე მიიღო, რაც ცესკოდან გაყალბებული ხელმოწერებით რეგისტრაციაზე უარი მიიღეს. პარტიამ განცხადება დღეს, 9 აგვისტოს გაავრცელა.

"ჩვენ 1,5 თვის წინ საჯაროდ განვაცხადეთ, რომ თუ ონლაინ ვერ შევაგროვებდით 25 ათასი მხარდამჭერის ხელმოწერას, არჩევნებში არ მივიღებდით მონაწილეობას. ჩვენ შევაგროვეთ 7 ათასზე მეტი ხელმოწერა და უპირველეს ყოვლისა ამ ადამიანებისადმი პატივისცემის გამო არ ვაპირებთ საკუთარი დაპირების გადათქმას", - აღნიშნავენ პარტიაში.

მათი თქმით, ისინი საარჩევნო პროცესს მაინც არ ჩამოშორდებიან.

"ჩვენ ვიქნებით აქტიური მთელი წინასაარჩევნო პერიოდი და მოგიყვებით სიმართლეს, როგორც ყოველთვის", - ამბობენ გირჩში და ყველა იმ ადამიანს გადაუხადეს მადლობა, რომლებმაც მხარი დაუჭირეს.

ცენტრალურმა საარჩევნო კომისიამ პარტია გირჩის მიერ წარდგენილი 27 990 ხელმოწერიდან 27 977 ბათილად მიიჩნია. გირჩში აცხადებენ, რომ ცესკოში წარდგენილი გაყალბებული 27 990 ხელმოწერიდან 13 რეალური ხელმოწერა აღმოაჩინა. ცესკოს პრეს-სპიკერი ანა მიქელაძე On.ge-სთან საუბარში კი განმარტავს, რომ ბათილად სცნეს ყველა ის ხელმოწერა, რომელსაც არ ადასტურებდა ხელმოწერების შეგროვებაზე პასუხისმგებელი პირი, ან რომელშიც სრულად არ იყო მითითებული კანონით გათვალისწინებული მონაცემები.