Christie's, ერთ-ერთი უმსხვილესი სააუქციონო სახლი მსოფლიოში, 26 სექტემბერს ჰონგ-კონგში გასაყიდად კლოდ მონეს ცნობილ წყლის ლილიების ნახატს გამოიტანს. ეს ნამუშევარი 125 წლის წინ შეიქმნა და ფრანგი მხატვრის ერთ-ერთი პირველი ნამუშევარია, სადაც ეს მცენარეა გამოსახული. შემდეგში ლილია მონეს მუზა გახდა და მისი შთაგონებით კიდევ ბევრი ნახატი შექმნა, რომელთა სერიასაც Nymphéas ეწოდება.

კლოდ მონე, წყლის ლილიები

ფოტო: Christie's

ეს ნახატი მონეს ოჯახის მფლობელობაში იმყოფებოდა იქამდე, სანამ კერძო კოლექციონერი შეიძენდა. Nymphéas სერიაში სულ 8 ნახატია, რომელთაგან 4 მსოფლიოს სხვადასხვა — პარიზის მონეს მუზეუმში, ლოს-ანჯელესის ხელოვნების მუზეუმში, კაგოშიმას ხელოვნების მუზეუმსა და რომში მდებარე თანამედროვე ხელოვნების ეროვნულ გალერეებშია წარმოდგენილი. Christie's-ის მიერ გასაყიდად გამოტანილი ნახატის საწყისი ფასი $25 მილიონი იქნება, თუმცა ვარაუდობენ, რომ ის $35 მილიონად გაიყიდება.

"როგორც ერთ-ერთი იმ რამდენიმე ნახატიდან, რომელიც ჯერ კიდევ კერძო კოლექციაში იმყოფება და მუზეუმს ჯერ-ჯერობით არ შეუსყიდია, მონეს ეს ნამუშევარი ჭეშმარიტი საგანძურია. პრივილეგირებულები ვართ, რომ ამ შთამაგონებელ ნახატს ჩვენს გემოვნებიან მყიდველებს წარვუდგენთ აზიაში და საკულტო დასავლურ ნამუშევრებზე მოთხოვნას უმაღლესი კალიბრის პასუხით შევეგებებით" — განაცხადა Christie's-ის მე-20/21-ე საუკუნეების ხელოვნების განყოფილების თავმჯდომარემ, კრისტიან ალბუმ.