მოკლედ: საქართველოს ტექნიკური უნივერსიტეტის რექტორის, დავით გურგენიძის თქმით, ქართული ოცნების მიერ მიღებული რუსული კანონი რუსული არ არის და კანონის საწინააღმდეგოდ სტუდენტურ გაფიცვას ხელს არ შეუწყობს.

  • "როგორც კი იქნება საშუალება, აღუდგენენ მათ [სტუდენტებს] ლექციებს. არ არის ეს რუსული კანონპროექტი, მე ასე ვთვლი. სტუდენტების გაფიცვას არ შევუწყობ ხელს", — თქვა გურგენიძემ დღეს, 16 მაისს, მედიასთან, მას შემდეგ, რაც სტუდენტები ტექნიკური უნივერსიტეტის ეზოში შეიკრიბნენ.

დეტალები: საქართველოს ტექნიკური უნივერსიტეტი არის იმ 36 უნივერსიტეტს შორის, რომლებმაც განაცხადეს, რომ "პოლიტიკური პროცესები აკადემიური სივრცის მიღმა უნდა დარჩეს" და არ უნდა აისახოს სწავლის პროცესზე.

  • ისინი აღნიშნავდნენ, რომ მათთვის მიუღებელია უნივერსიტეტების სახელით "გარკვეული ჯგუფების მიერ პოლიტიკური განცხადებების გაკეთება".

სტრიქონებს შორის: თავდაპირველად, განცხადებას ხელს აწერდა 38 უნივერსიტეტი, თუმცა, მოგვიანებით, კავკასიის საერთაშორისო უნივერსიტეტმა და შავი ზღვის საერთაშორისო უნივერსიტეტმა საკუთარი ხელმოწერა გამოითხოვეს.

  • უნივერსიტეტების განცხადების შემდეგ, ლექტორების ნაწილმა, პროტესტის ნიშნად დატოვა ის უნივერსიტეტები, რომელთა ადმინისტრაციაც გაემიჯნა სტუდენტურ პროტესტს რუსული კანონის წინააღმდეგ.

მსგავსი: ლევან ბერძენიშვილი კავკასიის უნივერსიტეტს ტოვებს

მსგავსი: ნიკო ნერგაძე კავკასიის უნივერსიტეტს ტოვებს — მიზეზი უმაღლესი სასწავლებლის ხელმძღვანელობის პოზიციაა

კონტექსტი: 16 მაისის მონაცემებით, საქართველოში 30-ზე მეტი უნივერსიტეტის სტუდენტების ნაწილია გაფიცული. ისინი აცხადებენ რომ აუდიტორიებში არ დაბრუნდებიან მანამ, სანამ მთავრობა რუსულ კანონს არ გაიწვევს.

  • სტუდენტურ გაფიცვას შეუერთდნენ სხვადასხვა უნივერსიტეტების ლექტორები და პროფესორები.

ამ თემაზე: თსუ-ს 160-ზე მეტი პროფესორ-მასწავლებელი სტუდენტების გაფიცვას უერთდება

  • გუშინ, 15 მაისს, განათლების ხარისხის განვითარების ეროვნული ცენტრი უნივერსიტეტებში სასწავლო პროცესის შეჩერებასა და გადავადებას გამოეხმაურა.
  • მათი თქმით, უნივერსიტეტების ადმინისტრაცია ვალდებულია, განსაზღვრული აკადემიური კალენდრის შესაბამისად, სასწავლო პროცესი შეუფერხებლად წარმართოს.