ვენეციაში შესვლა ტურისტებისთვის ფასიანი გახდა. ტურისტების ერთ-ერთი საყვარელი ადგილი ამ ახალი წესით ერთ-ერთ პირველ დიდ ქალაქად იქცა, სადაც შესვლა ფასიანი იქნება.

ვენეციის მერი წესის შემოღების მიზეზს ხსნის — მათი თქმით, იუნესკოს მსოფლიო მემკვიდრეობის სიაში შესულ ვენეციას ამ გზით ტურისტების დიდი ნაკადისგან და ამით მიყენებული ზიანისგან იცავენ. ქალაქში შესვლა €5 ეღირება. მერის თქმით, ქალაქში ცხოვრებას ამდენი ტურისტის არსებობა ფაქტობრივად შეუძლებელს ხდის, რის გამოსწორებასაც ახალი წესით ცდილობს. ეს წესი ჯერჯერობით 25 აპრილიდან 14 ივლისის ჩათვლით იმოქმედებს. ქალაქში შესასვლელად ბილეთების ყიდვა ტურისტებს ონლაინ შეუძლიათ

1950-იანი წლების შემდეგ ვენეცია 120 000-ზე მეტმა მოსახლემ დატოვა, ამის ერთ-ერთი მთავარი მიზეზი კი სწორედ მასობრივი ტურიზმი იყო, აქციის მონაწილეები კი თვლიან, რომ ქალაქში შესასვლელი გადასახადი ვენეციას კიდევ უფრო ტურისტულ ადგილად აქცევს.

შესვლის საფასურის გადახდა ტურისტებს მხოლოდ იმ შემთხვევაში დასჭირდებათ, თუ მათ ქალაქის ისტორიული ნაწილის დათვალიერება მოუნდებათ. ფასის გადახდა არ მოუწევთ იმ ტურისტებს, რომლებიც ქალაქში ღამეს ათევენ, ასევე, წესი ვენეციის მაცხოვრებლებზე, 14 წლამდე ბავშვებზე, მოხუცებსა და სტუდენტებზე არ იმოქმედებს.

ადამიანებს, რომლებიც საფასურის გადახდის გარეშე ცდიან ქალაქში შესვლას, ჯარიმის გადახდა მოუწევთ. ვენეციის მერის თქმით, თუ ახალი წესი წარმატებული გამოდგება, ის ქალაქის მოსახლეობას გადასახადებს გაუუქმებს.

ვენეციის მოსახლეობის ნაწილი ქალაქში შესვლის გადასახადის დაწესებას არ ეთანხმება და დიდ აქციებს აანონსებს. მათი თქმით, ვენეციაში შესვლისთვის ფასის გადახდა ქალაქს გასართობ პარკად აქცევს და ქალაქის რეპუტაციას აზიანებს. ასევე, აქციის მონაწილეები თვლიან, რომ ტურისტებს 5 ევროს გადახდა ვერ შეაჩერებთ და ტურისტების ნაწილისთვის ფასის დაწესებას, ნაწილის კი უფასოდ შემოშვებას არ ეთანხმებიან. ისინი ამბობენ იმასაც, რომ თუ მერიას მოსახლეობის დახმარება სურს, ქალაქში ფასების დარეგულირებაზე უნდა იზრუნონ, მაგალითად, ბინის ქირაობა უფრო ხელმისაწვდომი გახადონ.