მოკლედ: ჭიჭინაძის ქუჩაზე, პარლამენტის შენობის გვერდითა შესასვლელთან, პარტია ახალის ლიდერების მობილიზებას დაძაბულობა მოჰყვა. პოლიცია ადგილიდან მათ გაყვანას ცდილობდა.

  • ადგილზე ფიზიკური დაპირისპირებაც მოხდა.

დეტალები: "შიში ოხერია, შიში ამთავრებს ყველანაირ ხელისუფლებას, ესენიც დასრულდებიან", — თქვა გვარამიამ. ის ისევ ადგილზე, საკანონმდებლო ორგანოს გვერდითა შესასვლელთან რჩება, ისევე, როგორც ნიკა მელია, პარტია ახალის კიდევ ერთი ლიდერი.

  • "მე მინდა თქვენს მკითხველს რიტორიკული კითხვით მივმართო: ახლა რაც აქ ხდება, უკანასკნელ დღეებში, რას გულშემატკივრობს რუსეთი, კანონპროექტის კანონად ქცევას და ქართულ ოცნებას, თუ კანონპროექტის გამოთხოვასა და ქართველ ხალხს? — ამბობს On.ge-სთან ნიკა მელია. "ყველამ გასცეს ამ კითხვას პასუხი და პასუხის თანახმად, სინდისის შესაბამისად იმოქმედოს."
  • ნიკა მელიას თქმით, იქამდე, ვიდრე ქვეყანაში არსებობს ხელისუფლების მიერ შექმნილი სახელმწიფოებრივი საფრთხე, "ყველას სახლი, ყველას ოჯახი, ძალიან შინაურული კერა არის რუსთაველის გამზირი მანამ, სანამ საფრთხე მინიმუმ, განეიტრალებული არ იქნება."

ამ წუთებში ჭიჭინაძის ქუჩა გადაკეტილია და მობილიზებულია საპოლიციო ძალები.

ბოლო ხაზი: ამ მომენტში პარლამენტის პლენარულ სხდომათა დარბაზში რუსული კანონის პირველი მოსმენა მიმდინარეობს. ამის გასაპროტესტებლად ხალხი რუსთაველის ქუჩაზე იკრიბება.