რა ხდება: უნგრეთის პრემიერ-მინისტრის ვიქტორ ორბანის მეტოქემ გუშინ, 6 აპრილს, ათობით ათასი ადამიანი გამოიყვანა ბუდაპეშტის ქუჩებში.

  • პეტერ მაგიარმა, რომელსაც ბოლო დრომდე მჭიდრო კავშირები ჰქონდა მთავრობასთან, თებერვალში წამოიწყო პოლიტიკური მოძრაობა, რომლის მიზანია, დაასრულოს ვიქტორ ორბანის 14-წლიანი მმართველობა.

დეტალები: აქციის მონაწილეები პარლამენტის შენობისკენ გაემართნენ, ისმოდა შეძახილები: "არ გვეშინია" და "გადადგეს ორბანი."

  • მაგიარმა პროტესტის მონაწილეებს მიმართა და უთხრა, რომ მისი ახალი მოძრაობა გააერთიანებდა ორბანის მმართველობით იმედგაცრუებულებს და არაეფექტიან პოლიტიკურ ოპოზიციას.
  • "ნაბიჯ-ნაბიჯ ვიბრუნებთ ჩვენს სამშობლოს და ვაშენებთ ახალ ქვეყანას, სუვერენულ, თანამედროვე, ევროპულ უნგრეთს“, — განუცხადა მაგიარმა მხარდამჭერებს.

ვინ არის პეტერ მაგიარი: ის წლების განმავლობაში თანამშრომლობდა მმართველ პარტია ფიდესსთან, ახლა კი, 43 წლის პოლიტიკოსმა გადაწყვიტა, რომ დროა, ახალი პოლიტიკური მოძრაობა შექმნას.

პეტერ მაგიარი

პეტერ მაგიარი

მან განაცხადა, რომ უნგრეთს მაფია მართავს, ოლიგარქების და ანტიდემოკრატიული ელიტების საშუალებით.

მაგიარმა, ასევე, დაადანაშაულა ორბანის ერთ-ერთი მინისტრი ცენტრალიზებული პროპაგანდისტული მანქანის მართვაში.

  • ამ ბრალდებებმა, შესაძლოა, გავლენა მოახდინოს ფიდესის შედეგებზე ევროპის საპარლამენტო არჩევნებისას.
  • ორბანს ევროკავშირი დიდი ხანია ადანაშაულებს უნგრეთში კანონის უზენაესობის დარღვევაში, მედიის კონტროლში და ქვეყნის საარჩევნო სისტემის მისი პარტიის ინტერესებზე მორგებაში.
  • ბრიუსელმა ბუდაპეშტს მილიარდობით ევროს ოდენობის დაფინანსება შეუჩერა.