მოკლედ: რუსული კანონის ხელახლა ინიციირების შემდეგ, ქართული ოცნების, პროსახელისუფლებო მედიასაშუალებებისა თუ ანონიმურ გვერდებზე, 120-მდე რეკლამა გამოქვეყნდა, სადაც კანონი მანიპულაციურად არის ახსნილი და მიჩქმალულია ზოგადი კონტექსტი, აცხადებს სამართლიანი არჩევნებისა და დემოკრატიის საერთაშორისო საზოგადოება (ISFED).

პროსახელისუფლებო გვერდები: გარეკლამებული პოსტების უმრავლესობა ქართული ოცნების წევრების განცხადებებია. მხოლოდ ერთ გვერდზე — POSTV-ახალი ამბები, მამუკა მდინარაძის, შალვა პაპუაშვილის, ირაკლი კობახიძისა და საპარლამენტო უმრავლესობის განცხადებებიდან 40-ზე მეტი ციტატაა გარეკლამებული.

  • განცხადებებში პარტია ქართლი ოცნების წევრები ადანაშაულებენ სამოქალაქო და დონორ ორგანიზაციებს, თითქოს, ისინი უარს ამბობდნენ ფინანსების გასაჯაროებაზე.

ISFED-ის მიხედვით, რეკლამები განთავსდა გვერდებზე:

  • საქართველოს მთავრობა და ქართული ოცნება / Georgian Dream
  • ირაკლი კობახიძე / ;POSTV - ანალიტიკა; POSTV - ახალი ამბები
  • Newshub.ge - ნიუსჰაბი, სინამდვილეში, ქართული ოცნება ჩემი არჩევანია;
  • Bidzina Ivanishvili for Georgia; პოლიტიკური სატირა / Political Satire;
  • პოლიტიკური აბსურდი, აგენტურა, ციტატა, PrimeNews.Ge.

საჯარო მოხელეების მიერ ქარდების, სავარაუდოდ, კოორდინირებულად გაზიარება: ISFED წერს, რომ რუსული კანონის მხარდამჭერ კამპანიაში, ოცნების ეროვნულ და ადგილობრივ წარმომადგენლებთან ერთად, მუნიციპალიტეტების ორგანოებში დასაქმებული საჯარო მოხელეებიც ჩაერთნენ.

  • ISFED-მა 30 მუნიციპალიტეტის ორგანოში დასაქმებული 96 საჯარო მოსამსახურე გამოავლინა, რომლებმაც 3-4 აპრილის განმავლობაში, ფეისბუქის პირად ანგარიშზე იდენტური ქარდები საჯარო პოსტის სახით გამოაქვეყნეს.

კონტექსტი: 3 აპრილს, ქართული ოცნების აღმასრულებელმა თავმჯდომარემ და უმრავლესობის ლიდერმა, მამუკა მდინარაძემ, განაცხადა, რომ ოცნება ისევ აპირებს, "უცხო აგენტად" გამოაცხადოს დამოუკიდებელი მედიასაშუალებები, რომელთა შემოსავლის 20%-ზე მეტის წყარო "უცხოური ძალაა", ანუ საგრანტო პროექტებია.

  • მდინარაძის თქმით, "კანონპროექტი საქართველოს პარლამენტში დაინიცირდება ზუსტად იმავე ტექსტით, როგორც შარშან იყო".

გასული, 2023 წლის მარტში ანალოგიური კანონპროექტის ინიციირებას საზოგადოება პარლამენტის წინ აპროტესტებდა, სამართალდამცავებმა კი ისინი რამდენჯერმე დაშალეს წყლის ჭავლის, წიწაკის სპრეისა და ცრემლსადენი გაზის გამოყენებით.

  • შემდეგ, მძლავრი საზოგადოებრივი წინააღმდეგობის ფაქტორის გამო, მმართველმა პარტიამ კანონპროექტი ჩააგდო.