რა ხდება: თურქეთის მუნიციპალური არჩევნების შედეგები ცნობილია — ოპოზიციურმა სახალხო რესპუბლიკურმა პარტიამ (CHP) 81 მუნიციპალიტეტიდან 36-ში გაიმარჯვა.

• თურქეთის პრეზიდენტმა, რეჯეფ თაიფ ერდოღანმა, არჩევნების შედეგები აღიარა და ადგილობრივ არჩევნებს, თავისი შედეგით, "გარდამტეხი მომენტი" უწოდა.
• ანკარაში გამოსვლისას, ერდოღანმა პირობა დადო, რომ თვითკრიტიკულად შეაფასებს მიღებულ შედეგებს და აღნიშნა, რომ მისი პარტია, თურქეთის მასშტაბით, შესაბამის სიმაღლეზე აღარ დგას.

დეტალები: ამ მუნიციპალურ არჩევნებზე თურქეთის სახალხო რესპუბლიკურმა პარტიამ ქვეყნის მასშტაბით, ხმების 37 % მოიპოვა.

• ეს საუკეთესო მაჩვენებელია ოპოზიციური პარტიებისთვის, ხელისუფლებაში ერდოღანის მოსვლის შემდეგ.
• ოპოზიციამ, ასევე გაიმარჯვა დიდ ქალაქებში, მათ შორის, ანკარასა და სტამბოლში.
• საარჩევნო უბნებზე ამომრჩეველთა აქტივობა მაღალი იყო და 77 %-ს მიაღწია.

ერდოღანის შეფასება: თურქეთის პრეზიდენტმა პირობა დადო, რომ გააანალიზებს საარჩევნო კამპანიისა და ხმის მიცემის პერიოდში ხალხისგან მიღებულ გზავნილებს და "აუცილებლად გადადგამს საჭირო ნაბიჯებს" მიღებულ გამოწვევებზე საპასუხოდ.

• ასევე, აღნიშნა, რომ "ხალხის გადაწყვეტილება აისახა საარჩევნო პროცესზე ზეწოლის გარეშე" და ეს, მისი თქმით, დემოკრატიისთვის დიდი მიღწევაა: "არ შევეწინააღმდეგებით ჩვენი ერის გადაწყვეტილებას და არ ვიმოქმედებთ ეროვნული ნების საწინააღმდეგოდ", — თქვა მან.

კონტექსტი: ადგილობრივი არჩევნები განიხილებოდა, როგორც ქვეყანაში 70 წლის ერდოღანის პოპულარობის საზომი. ერდოღანი იმედოვნებდა, რომ მისი პოლიტიკური პარტია დაიბრუნებდა კონტროლს ქვეყნის ძირითად, დიდ ქალაქებზე.

• ანალიტიკოსები მიიჩნევენ, რომ ერდოღანისა და მისი პარტიის ყველაზე დიდი საარჩევნო წარუმატებლობა, განპირობებულია ქვეყანაში ბოლო წლებში არსებული ეკონომიკური მდგომარეობით.

• გასულ თვეს, თურქეთში ინფლაციამ 70 %-ს მიაღწია და მოსალოდნელია, რომ კიდევ გაიზარდოს.

• ოპოზიცია, ეკონომიკურ ფაქტორებთან ერთად, ქვეყნის პრეზიდენტის "ავტორიტარულ პოლიტიკაზეც" აკეთებდა აქცენტს, რამაც, საერთო ჯამში, მათ წარმატება მოუტანა.

რა ვიცით გამარჯვებული პარტიის შესახებ: არჩევნებში გამარჯვებული რესპუბლიკური სახალხო პარტია თურქეთში ძველ, და ერთ-ერთ ყველაზე აქტიურ პარტიად მიიჩნევა.

• ღირებულებებით, ისინი მიჰყვებიან ქემალისტურ, მემარცხენე-ცენტრისტულ ხაზს.

სტრიქონებს შორის: ქემალიზმი/ათათურქიზმი, იგივე 6 ისარი, თურქეთის რესპუბლიკის დამფუძნებელი იდეოლოგიაა. მუსტაფა ქემალ ათათურქმა მიზნად დაისახა გაეტარებინა სოციალური, პოლიტიკური, კულტურული და რელიგიური რეფორმები, რათა შეექმნა ახალი თურქული სახელმწიფო დასავლური ცხოვრების წესით. ქემალიზმი მოიცავს ექვს ფუნდამენტურ იდეოლოგიას — რესპუბლიკანიზმი, პოპულიზმი, ნაციონალიზმი, სეკულარიზმი, სტატიზმი და რეფორმიზმი.

• ამ პარტიამ, 2007 წლის საპარლამენტო არჩევნებში მემარცხენე დემოკრატიულ პარტიასთან კოალიციაში ხმების 22 % მიიღო და 112 ადგილით შევიდა თურქეთის პარლამენტში.
• მოსალოდნელია, რომ მომდევნო, საპრეზიდენტო არჩევნებში, პრეზიდენტად წარადგინოს თავი 53 წლის ექრემ იმამოღლუმ, სტამბოლის მერმა, რომელმაც ამ არჩევნებში სტამბოლში მოიპოვა გამარჯვება.

საპრეზიდენტო არჩევნების კონტექსტი: ერდოღანს, კონსტიტუციის თანახმად, მომდევნო საპრეზიდენტო არჩევნებზე კენჭისყრაში მონაწილეობის უფლება აღარ აქვს, თუმცა, ექსპერტები ვარაუდობდნენ, რომ თუ მისი პარტია მიაღწევდა წარმატებას ამ მუნიციპალურ არჩევნებში, მოსალოდნელი იყო, ერდოღანის პარტიას შეეცვალა კონსტიტუცია, რათა მოქმედ პრეზიდენტს კვლავ მიეღო მონაწილეობა საპრეზიდენტო არჩევნებში.

ბოლო ხაზი: ქვეყნის მასშტაბით, სულ 200 000 საარჩევნო უბანი იყო გახსნილი და ერთმანეთს კონკურენციას 34 პოლიტიკური პარტია უწევდა.