პანკისის ხეობის მეჩეთში დანიშნულ იმამს ჩეჩნეთის მთავრობის ჯაშუშობაში ადანაშაულებენ.

21 მარტს, თურქეთში მცხოვრებმა ჩეჩენმა ოპოზიციურმა ბლოგერმა ხასან ხალიტოვმა განაცხადა, რომ ტაჰირ დუიშვილი, უშუალოდ, ჩეჩნეთის სამუფთომ დანიშნა. სამუფთო არის ადგილობრივი მუსლიმების ტრადიციული წარმომადგენლობითი ორგანო ჩეჩნეთში.

"კადიროვის სამუფთომ მიიწვია ტაჰირ დუიშვილი, რომ გამხდარიყო იმამი პანკისის ერთ-ერთ მეჩეთში და ამით შეეგროვებინა ინფორმაცია ადგილობრივ ძმებზე, რომლებსაც ისინი სალაფიტებად მიიჩნევენ“, — დაწერა ხალიტოვმა Telegram-ზე.

ჩეჩნები, მათ შორის ქისტები, ჩეჩნური ქვეჯგუფი პანკისიდან, ტრადიციულად, მისდევდნენ ისლამის ფორმას, რომელიც ცნობილია როგორც სუფიზმი. თუმცა, ბოლო წლებში სალაფიზმი სულ უფრო პოპულარული ხდება პანკისში.

ხალიტოვმა გააზიარა, სავარაუდოდ, დუიშვილის აუდიოჩანაწერი, რომელშიც ისმის მამაკაცის მიმართვა ჩეჩნეთის სამუფთოსადმი. რადიო თავისუფლების ცნობით, ჩანაწერში ისმის, რომ მამაკაცი სამუფთოს "ნდობისთვის" მადლობას უხდის და "პანკისში მათთვის სასურველი ნიადაგის მომზადებას" ჰპირდება.

სულხან ბორძიკაშვილმა, პანკისელმა ჟურნალისტმა, OC Media-ს განუცხადა, რომ დუიშვილი, სავარაუდოდ, დაკარგავს ლეგიტიმაციას ადგილობრივ სუფიებს შორის, ბრალდებების გამო. თუმცა, ის ამტკიცებდა, რომ გროზნოში მისი სავარაუდო დანიშვნა არ იყო პანკისის "ყველაზე დიდი პრობლემა".

"მიმაჩნია, რომ ქვეყანა უფრო სერიოზული პრობლემის წინაშე დგას, ვიდრე პატარა სოფლის იმამი; ვგულისხმობ რუსეთის გავლენის ზრდას საქართველოში“, — განაცხადა ბორძიკაშვილმა. "ეს ეხება არა მხოლოდ პანკისის ხეობას, არამედ მთლიანად ჩვენს ქვეყანას“.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.