მოკლედ: კომპანია სილქნეტი აცხადებს, რომ მომხმარებელთა "მცირე ჯგუფის", დაახლოებით 2000-მდე ადამიანის მონაცემების უნებართვო წვდომისა და გამჟღავნების შესაძლო ფაქტთან დაკავშირებით, "რეაგირება მიმდინარეობს".

დეტალები: კომპანია წერს, რომ "სავარაუდო კომპიუტერული ინციდენტის ფაქტზე", ინფორმაციული უსაფრთხოების შესახებ საქართველოს კანონის შესაბამისად, ის თანამშრომლობს სახელმწიფო უსაფრთხოების სამსახურის ოპერატიულ-ტექნიკურ სააგენტოსთან, როგორც კიბერუსაფრთხოების რეგულატორთან.

  • სილქნეტი ასევე აცხადებს, რომ აბონენტთა ზარების, ტექსტური შეტყობინებებისა და სხვა ტელეკომ სერვისების ინფორმაციის კანონსაწინააღმდეგო გავრცელება, არ მომხდარა.
  • "აქვე ხაზგასმით აღვნიშნავთ, რომ პერსონალური მონაცემების დაცვა, გამჭვირვალობა და ანგარიშვალდებულება კომპანიის ფუნდამენტური საკითხებია", — წერია განცხადებაში.

გარდა ამისა, სილქნეტის მიხედვით, უახლოეს მომავალში, ინციდენტის კვლევის შედეგებზე დაყრდნობით, შემდგომი სამართლებრივი რეაგირების საკითხებიც გადაწყდება.

  • კომპანია აღნიშნულ ფაქტთან დაკავშირებით, ეტაპობრივად გაასაჯაროებს ყველა საჭირო ინფორმაციას "იმ მოცულობით, რომ საფრთხე არ შეექმნას მიმდინარე კიბერუსაფრთხოების უზრუნველმყოფი ღონისძიებების ეფექტიანობასა და შემდგომი გამოძიების ინტერესებს".