რა ხდება: საპარლამენტო უმრავლესობის დეპუტატი გია ვოლსკი ადასტურებს, რომ დავით ხიდაშელი აფხაზეთთან კონფედერაციის იდეაზე ესაუბრა გუშინ, 6 მარტს, საქართველოს პარლამენტის შენობასთან ახლოსვე, ერთ-ერთ კაფეში გამართული შეხვედრისას.

დავით ხიდაშელი არის რუსული კავშირების მქონე ბიზნესმენი, რომელიც დაახლოებულია რუს ოლიგარქთან, ვლადიმირ ევტუშენკოვთან. ევტუშენკოვის კომპანია კი სანქცირებულია აშშ-ის მიერ, 2023 წელს. ევტუშენკოვი, ასევე, დაკავშირებულია ბიძინა ივანიშვილთან.

• "სიტყვა კონფედერაცია [დავით ხიდაშელმა] საკმაოდ ხმამაღლა ახსენა, ისე, რომ გვერდით მსხდომმა ადამიანებმა მოიხედეს კიდეც, რომ კარგი იქნება, აფხაზეთთან შეიქმნას კონფედერაცია. საზოგადოების დიდმა ნაწილმა იცის, რომ კონფედერაცია შეიძლება, მაგრამ ასეთ ვითარებაში, ამაზე საუბარი არ არის", — თქვა გია ვოლსკიმ დღეს ჟურნალისტებთან.

რას ნიშნავს კონფედერაცია: მყიფე პოლიტიკური გაერთიანება, რომელიც არ წარმოადგენს საერთაშორისო სამართლის სუბიექტს და ყალიბდება განსაზღვრული პოლიტიკური მიზნის მისაღწევად და არა — ხანგრძლივი ვადით. მეტი

რა გავიგეთ შეხვედრის შესახებ დროასგან: ვოლსკი-ხიდაშელის შეხვედრის შესახებ ინფორმაცია დროამ გაავრცელა, დამადასტურებლად, ვიდეომასალასთან ერთად.

მოძრაობამ გუშინვე გამოაქვეყნა საკითხები, რომელზეც, მათი თქმით, შეხვედრისას საუბრობდნენ.

"განიხილავენ შემდეგ საკითხებს:

• აფხაზეთის რკინიგზის აღდგენა;
• პირდაპირი ურთიერთობა აფხაზეთის მარიონეტულ რეჟიმთან;
• საქართველოს უმაღლესი პოლიტიკური თანამდებობის პირების არაფორმალური შეხვედრები საოკუპაციო რეჟიმის წარმომადგენლებთან აფხაზეთში;
• ბიზნეს ურთიერთობები ოკუპირებულ ტერიტორიებზე", — დაწერეს მათ.

ვოლსკიმ დღეს დაადასტურა, რომ მათი საუბარი აფხაზეთის საკითხებს მოიცავდა: "დავით ხიდაშელმა დამირეკა, არ ვიცნობდი, საინტერესო მოსაზრებები მაქვს აფხაზეთთან დაკავშირებითო."

რატომ არის ეს თემა მნიშვნელოვანი: გარდა იმისა, რომ დავით ხიდაშელი არის რუს ოლიგარქთან, ვლადიმირ ევტუშენკოვთან დაკავშირებული პირი, მას აქვს მაღალი დონის კავშირები საქართველოს ხელისუფლებასთან და ბიძინა ივანიშვილთან.

• ხიდაშელი და რაჭის ტყეები: სწორედ მის კომპანიას გადასცა სახელმწიფომ რაჭაში 104,712 ჰექტარ ტყეზე (რაჭის ტერიტორიის მესამედი და ქვეყნის ტერიტორიის 1.4%) სამონადირეო მეურნეობის მოწყობის 49 წლიანი ლიცენზია. საზოგადოებრივი აზრის ზეწოლის შედეგად კი, გარემოს ეროვნულმა სააგენტომ ძალადაკარგულად გამოაცხადა ბრძანება 2023 წლის ნოემბერში.
• მანამდე, ორგანიზაცია საერთაშორისო გამჭვირვალობა — საქართველომ განაცხადა, რომ დავით ხიდაშელთან დადებული გარიგების შედეგად, საქართველომ 2 მილიონი ლარის შემოსავალი დაკარგა.
• ხიდაშელი და კარტოგრაფების საქმე: ის, ასევე, არის სკანდალურად ცნობილი ე.წ. კარტოგრაფების საქმის მთავარი ფიგურანტი: კარტოგრაფების საქმის მასალების მიხედვით, დავით ხიდაშელმა 1938 წელს გამოცემული 1:200 000 მასშტაბის რუკა ჩამოიტანა საქართველოში. მისი თქმით, რუკა რუსეთის არქივებიდან აქვს. ხიდაშელმა განაცხადა, რომ დახმარებისთვის მას ქართული ოცნების თავმჯდომარემ, ბიძინა ივანიშვილმა დაურეკა.
• კარტოგრაფების საქმეს ივერი მელაშვილისა და ნატალია ილიჩოვას დაპატიმრება, შემდეგ კი გირაოს სანაცვლოდ მათი გათავისუფლება მოჰყვა.
• ხელისუფლებამ კარტოგრაფების საქმის აღძვრისთანავე, პროპაგანდისტული კამპანია შექმნა, სახელწოდებით — გარეჯი საქართველოა.

ბოლო ხაზი: 2021 წელს, ბიძინა ივანიშვილმა თქვა, რომ დავით ხიდაშელი, რომელმაც აზერბაიჯანთან საზღვრის დელიმიტაცია-დემარკაციის საქმის რუკები მოიპოვა, მასზე მეტად ქველმოქმედია, მადლობა გადაუხადა და განაცხადა, რომ ამ საქმეს გმირობაში უთვლის.