მოკლედ: სამოქალაქო აქტივისტს ნატა ფერაძეს და მასთან ერთად მყოფ ორ პირს, სოფელ დიღომში, რამდენიმე პიროვნებამ სიტყვიერი შეურაცხყოფა მიაყენა.

  • ამის შესახებ ნატა ფერაძემ გუშინ, 6 მარტს, ფეისბუქგვერდზე დაწერა.

დეტალები: ნატა ფერაძე On.ge-თან საუბრისას ამბობს, რომ სოფელ დიღმის ცენტრში მდებარე საცხობიდან გამოსვლის შემდეგ, სიტყვიერი შეურაცხყოფა მას ჯერ ერთმა პირმა მიაყენა, მალევე კი მათთან, დაახლოებით, 10-მდე ადამიანი კიდევ მივიდა.

  • "თან მახლდა ორი აქტივისტი ბიჭი, მეგობარი, საცხობიდან რომ გამოვედით, ერთმა დაიწყო აგრესიული გინება და შეურაცხყოფა და თან ცდილობდა, გამოეწვია ბიჭები, რომ მათ დაერტყათ, თან ლაივსაც იღებდნენ, წრეში ჩაგვაყენეს და გაგვრეკეს მანქანისკენ. არ ავყევით პროვოკაციას და მანქანაში ჩავსხედით", — ამბობს ნატა ფერაძე.
  • ფერაძემ დიღმის პოლიციას გუშინვე მიმართა და განცხადება დაწერა, "ადმინისტრაციული სამართალწარმოება დაწყებულია და წერილობით გაცნობებთ ყველაფერსო".
  • On.ge დაუკავშირდა შსს-ს, ინფორმაციის მიღების შემთხვევაში მასალა განახლდება.

ბოლო ხაზი: On.ge-სთან საუბარში ნატა ფერაძემ აღნიშნა, რომ მუქარის შემცველ შეტყობინებებსაც ხშირად იღებს, რაზეც პოლიციას აცნობა, თუმცა, "ამას არავითარი რეაგირება არ მოჰყოლია".

  • ფერაძე იანვარში პრორუსული ძალადობრივი მოძრაობა ალტ-ინფოს მხრიდან მუქარის და სიტყვიერი თავდასხმის მსხვერპლი გახდა — მას შემდეგ რაც 9 იანვარს, სამების ეკლესიაში, სტალინის გამოსახულებიანი ხატისთვის საღებავის შესხმის ვიდეო გაავრცელა.
  • ალტ-ინფომ 10 ინვარს, ფერაძის სახლთან აქცია გამართა.

გაიგე მეტი: როცა ნატა ფერაძეზე ვსაუბრობთ, ნიშნავს, ვსაუბრობთ სიტყვისა და გამოხატვის თავისუფლებაზე. აი, რატომ