მოკლედ: განათლების მეცნიერებისა და ახალგაზრდობის მინისტრმა გიორგი ამილახვარმა განაცხადა, რომ 2024 წელს სამინისტრო ახალგაზრდებს შესთავაზებს მასშტაბურ ახალგაზრდულ ფესტივალს, რომელშიც საქართველოს ყველა უნივერსიტეტიდან 25 000-მდე სტუდენტი ჩაერთვება.

• დღეს, 5 მარტს, მინისტრმა, პრემიერ-მინისტრ ირაკლი კობახიძესთან ერთად, ახალგაზრდული პოლიტიკის ხედვა წარადგინა.

დეტალები: მინისტრის თქმით, 2024 წელს ახალგაზრდებს შესთავაზებს "პირად ინტერესებზე მორგებულ" თემატურ ღონისძიებებს — შემეცნებით, საგანმანათლებლო, სპორტულ, კულტურულ, შემოქმედებით აქტივობებს.

• "ახალი ინიციატივების განხორციელებით ჩვენ ვიზრუნებთ, რომ საქართველოს ჰყავდეს ეროვნულ-სახელმწიფოებრივი, პატრიოტული, ზოგადსაკაცობრიო, ზნეობრივი და მორალური ღირებულებების მქონე ახალგაზრდა თაობა, რომელიც თანამედროვე სამყაროში არსებულ კონკურენტულ გარემოში შეძლებს საკუთარი პოტენციალის სრულად რეალიზებას", — განაცხადა გიორგი ამილახვარმა.

ახალგაზრდული პოლიტიკის ხედვა — რას მოიცავს:

ახალგაზრდული ფესტივალი: მინისტრის განცხადებით, 2024 წელს სამინისტრო ახალგაზრდებს შესთავაზებს "მასშტაბურ" ახალგაზრდულ ფესტივალს, რომელიც მოიცავს

• უნივერსიტეტებს შორის სპორტული ტურნირების ჩატარებას;
• კულტურული და შემოქმედებითი ღონისძიებების გამართვას;
• ინტერმედიას, რაც გულისხმობს საუნივერსიტეტო თეატრებს შორის კონკურსის ჩატარებას;
• STEM კონკურსს, რომელიც საშუალებას მისცემს ახალგაზრდებს მეცნიერების, ტექნოლოგიების, ინჟინერიისა და მათემატიკის მიმართულებით სხვადასხვა აქტივობაში მიიღონ მონაწილეობა.
• გარდა ამისა, მინისტრმა აღნიშნა, რომ ახალგაზრდებისთვის ჩატარდება მასშტაბური კონცერტები, მოეწყობა მრავალფეროვანი მუსიკალური საღამოები, სადაც მოწვეულნი იქნებიან ელექტრონული მუსიკის შემსრულებელი და საკლუბო სივრცის ცნობილი არტისტები.

თემატური კონკურსები და ბანაკები: ამილახვარის განცხადებით, განათლების სამინისტრო, ახალგაზრდობის სააგენტოსთან ერთად, "ბოლო ათწლეულის განმავლობაში ყველაზე მასშტაბურ თემატურ საგრანტო კონკურსს გამოაცხადებს", რომელიც საქართველოში მცხოვრები ყველა ახალგაზრდისთვის, "მათი საინტერესო, შემოქმედებითი იდეების, თუ პროექტების განხორციელების უნიკალური შესაძლებლობა იქნება".

• მინისტრის თქმით, 2024 წელს სამინისტრო ორგანიზებას გაუწევს ანაკლიის საზაფხულო და თემატურ ბანაკებს სხვადასხვა ლოკაციაზე, რომლებიც უმასპინძლებენ 4 000-მდე მონაწილეს.
• გარდა ამისა, განათლების და თავდაცვის სამინისტროს თანამშრომლობით, სხვადასხვა ადგილას, "ჯარის ბანაკი" მოეწყობა, რომელიც "ხელს შეუწყობს ქართული ჯარის შესახებ ცნობიერების ამაღლებას, ჯანსაღი ცხოვრების წესისა და ჯარის იდეის პოპულარიზაციას".

სტაჟირება სახელმწიფო სტრუქტურებში: განათლების მინისტრმა განაცხადა, რომ 2024 წელს სახელმწიფო კურსდამთავრებულებისთვის უზრუნველყოფს ანაზღაურებადი სტაჟირების პროგრამას საჯარო სტრუქტურებში.

• პირველად, კურსდამთავრებულთა საჯარო სტრუქტურებში სტაჟირების შესახებ, განცხადება საქართველოს პრემიერ მინისტრმა ირაკლი კობახიძემ გააკეთა და აღნიშნა, რომ პარლამენტის მიერ 2023 წელს მიღებული კანონი ახალგაზრდებისთვის ანაზღაურებადი სტაჟირების შესაძლებლობის მინიჭების შესახებ, 2024 წელს უნდა ამოქმედდეს.
• კობახიძის თქმით, 2024 წელს მთავრობამ 2-3 ათასი სტუდენტის, სახელმწიფო სტრუქტურებში სულ მცირე 4-თვიანი სტაჟირების გავლა უნდა უზრუნველყოს.
• გარდა ამისა, მუნიციპალიტეტებთან და კერძო სექტორთან თანამშრომლობისა საფუძველზე, ახალგაზრდებს მიეცემათ საშუალება მუნიციპალურ და კერძო სტრუქტურებშიც გაიარონ ანაზღაურებადი სტაჟირება.

გაიგე მეტი: პრეზიდენტის სიტყვამ, რომლითაც ახალგაზრდებს მიმართა, მთავრობა ისევ გააბრაზა — რა მოხდა