საქართველოს პარლამენტის თავმჯდომარის პირველი მოადგილე თამარ ჩუგოშვილი თათია დოლიძის მიმართ ქსენოფობიური ქართული მარშის ორგანიზატორების მხრიდან გაუპატიურების მუქარას გამოეხმაურა:

"საჯარო სივრცეში აქტიური ქალის მიმართ სიძულვილის ხარისხი და გამოხატვის ფორმები ყველა წითელ ხაზს სცდება. მეც არაერთხელ გავმხდარვარ უზრდელი თავდასხმების ობიექტი, ისევე როგორ ყველა საჯარო სივრცეში აქტიური სხვა ქალი. ძალიან კარგად მესმის რასაც ნიშნავს ასეთი ბინძური შემოსევები".

ჩუგოშვილი მიიჩნევს, რომ იმ ადამიანებს, რომლებსაც არ შეუძლიათ კონკურენციის გაწევა აქტიური, ჭკვიანი და წარმატებული ქალებისთვის, "ისღა რჩებათ სიბინძურით სცადონ მათი დაკნინება".

ჩუგოშვილი დასძენს, რომ აუცილებელია საჯარო სივრცეში მეტი აქტიური ქალი იყოს, ამიტომაც პარლამენტი სესიის გახსნისთანავე განიხილავს სავალდებულო კვოტების საკითხს.

გაეროში საქართველოს ახალგაზრდობის ყოფილი წარმომადგენლის, თათია დოლიძის, მიმართ გაჟღერებულ მუქარაზე, შინაგან საქმეთა სამინისტრომ გამოძიება 151-ე მუხლით დაიწყო.

თათია დოლიძის მიმართ ქსენოფობიური ქართველთა მარშის ორგანიზატორები და მონაწილეები, გუშინ, 16 ივლისს, ფეისბუკზე სექსუალური ძალადობის შინაარსის კომენტარებს წერდნენ, რომლებიც მუქარად აღიქმებოდა.


დღეს, აღნიშნული პოსტი აღარ იძებნება, თავად პოსტების ავტორთა ნაწილი კი ამბობს, რომ მათ ეს არ დაუწერიათ.

"ქართველთა მარშის" მონაწილეები გამოირჩევიან ქსენოფობიური, რასისტული, თუ ჰომოფობიური განწყობებით, მათ მიერ 14 ივლისს გამართული აქცია სწორედ ამგვარი განწყობების დემონსტრირება იყო.