შინაგან საქმეთა სამინისტროს თათია დოლიძის მიმართ ქართველთა მარშის ორგანიზატორებისა და მონაწილეების მუქარაზე გამოძიება ჯერ არ დაუწყია.

შსს-ში განმარტავენ, რომ კანონის შესაბამისად, მუქარის შემთხვევაში უწყებაში აუცილებლად უნდა შევიდეს განცხადება:

"რეაგირებას მოვახდენთ იმ წუთას, როგორც კი შემოვა სამინისტროში განცხადება."

შინაგან საქმეთა სამინისტროს რეაგირებისკენ მოუწოდა ორგანიზაციამ ქალთა მოძრაობა. ქალთა უფლებადამცველები გამოძიების დაწყებასა და მუქარის ავტორების მიერ საჯარო ბოდიშის მოხდას მოითხოვენ.

თათია დოლიძის მიმართ ქსენოფობიური ქართველთა მარშის ორგანიზატორები და მონაწილეები, გუშინ, 16 ივლისს, ფეისბუკზე სექსუალური ძალადობის შინაარსის კომენტარებს წერდნენ, რომლებიც მუქარად აღიქმებოდა. დღეს, აღნიშნული პოსტი აღარ იძებნება, თავად პოსტების ავტორთა ნაწილი კი ამბობს, რომ მათ ეს არ დაუწერიათ. "ქართველთა მარშის" მონაწილეები გამოირჩევიან ქსენოფობიური, რასისტული, თუ ჰომოფობიური განწყობებით, მათ მიერ 14 ივლისს გამართული აქცია სწორედ ამგვარი განწყობების დემონსტრირება იყო.

განახლება: შსს-მ თათია დოლიძის მიმართ გაუპატიურების მუქარაზე გამოძიება დაიწყო.