ტომ ჰოლანდერი ცნობილი ბრიტანელი მსახიობია, რომელმაც კარიერა ჯერ კიდევ 1981 წელს დაიწყო — თავისი კოლეგის, ტომ ჰოლანდის, დაბადებამდე 15 წლით ადრე. მას მიღებული აქვს ბრიტანული კინოაკადემიის ჯილდოც, თუმცა, ეჭვგარეშეა, ჰოლანდი უფრო პოპულარული გახდა. აი, მათი სახელების მსგავსებას კი თურმე ხშირად გამოუწვევია გაუგებრობა.

ჰოლანდერი ცოტა ხნის წინ სეთ მაიერსის შოუში იყო სტუმრად, სადაც წამყვანმა წინასწარვე გააფრთხილა, უხერხულ საკითხს უნდა შევეხოო და ჰკითხა, ტომ ჰოლანდში თუ ერეოდათ იგი.

"კი და ეს ძალიან ძნელია", — უპასუხა ჰოლანდერმა ნახევრად ხუმრობით. მისი თქმით, ხშირად მშობლები ეუბნებიან ხოლმე, ჩემს შვილებს თქვენთან შეხვედრა უნდათო; მაგრამ, რა გასაკვირია, ბავშვები ბოლოს იმედგაცრუებულები რჩებიან თურმე.

ჰოლანდერმა ასევე გაიხსენა, როგორ ჩაურიცხეს ერთხელ შეცდომით ჰოლანდისთვის განკუთვნილი თანხა, როცა ორივე მათგანს ცოტა ხნით ერთი აგენტი ჰყავდა.

"თეატრში ვიყავი", — ჰყვება მსახიობი, — "ახალდასრულებული მქონდა BBC-ის სერიალზე მუშაობა, რომლისთვის 30 ათასამდე [გირვანქა სტერლინგი] გადამიხადეს. ვფიქრობდი, ავშენდი, მომავალ წლამდე მაინც გავიტან თავს-მეთქი. მერე კი, შესვენებაზე, ელფოსტა შევამოწმე და აგენტის წერილი დამხვდა, The Avengers-ის შემოსავლიდან პირველი ბონუსის ჩეკს გიგზავნითო".

///

ჰოლანდერი, რა თქმა უნდა, დაიბნა, რადგან მარველის ამ პოპულარულ ფილმში იგი საერთოდ არ მონაწილეობდა. თანაც, ამატებს, ამ ოდენობის თანხა მანამდე არასდროს მენახაო — "ეს შვიდნიშნა რიცხვი იყო".

"ეს მისი ჰონორარი კი არ იყო, ბონუსი გახლდათ, თანაც მხოლოდ ფილმის თავდაპირველი შემოსავლიდან" — ჰყვება ჰოლანდერი, — "ამ დროს [ჰოლანდი] ალბათ 20 წლის იქნებოდა, ასე რომ, მაშინვე გამიქრა კმაყოფილების შეგრძნება, მანამდე რომ მქონდა. მაგრამ ეს ხომ შოუბიზნესია".