მალე მაყურებელი დონალდ ტრამპის შესახებ გადაღებულ ბიოგრაფიულ ფილმს, სახელად The Apprentice-ს, იხილავს. ახალგაზრდა ტრამპის როლს მსახიობი სებასტიან სტანი ასრულებს. ფილმის გადაღებებიდან პირველი ფოტო უკვე გავრცელდა, რომელშიც სებასტიან სტანის ცნობა ნამდვილად გაგიჭირდებათ.

ფოტო: PATRIOT PICS / BACKGRID

როგორც ფილმის აღწერიდან ვიგებთ, The Apprentice იმ პერიოდის შესახებ გვიყვება, როცა ახალგაზრდა დონალდ ტრამპმა 1970-იანი წლების ნიუ-იორკში უძრავი ქონების ბიზნესი დაიწყო. სწორედ ამიტომ, სებასტიან სტანს გავრცელებულ ფოტოში შავი კოსტიუმით, ჰალსტუხით და პარიკით ვხედავთ.

სებასტიან სტანის გარდა, ფილმში მარია ბაკალოვასაც ვიხილავთ, რომელიც ივანა ტრამპს განასახიერებს. სწორედ იმ პერიოდში, რომლის შესახებაც ფილმის სიუჟეტი გვიყვება, დონალდ და ივანა ტრამპები საქმიანი პარტნიორები იყვნენ, 1977 წელს კი იქორწინეს. წყვილი 1992 წელს განქორწინდა, 2020 წელს კი ივანა ტრამპი გარდაიცვალა.

The Apprentice-ის რეჟისორი ალი აბასია, რომელიც ასევე HBO-ს ცნობილ სერიალ The Last of Us-ის პირველ სეზონზე მუშაობდა. დონალდ ტრამპის შესახებ ახალ ბიოგრაფიულ ფილმში ჯერემი სტრონგსაც ვიხილავთ, რომელიც როი კონს განასახიერებს. როი კონი ცნობილი ადვოკატია, რომელსაც დონალდ ტრამპი კარიერის დასაწყისში საკუთარ მენტორადაც კი თვლიდა.

The Apprentice-ის გადაღებები უკვე დაიწყო, პრემიერის თარიღი კი ამ ეტაპზე უცნობია.