MTV-ის ევროპის მუსიკალური დაჯილდოება (EMAs) წელს აღარ გაიმართება. დაჯილდოება 2023 წლის 5 ნოემბერს პარიზში უნდა შემდგარიყო, თუმცა ისრაელ-ჰამასის ომის გამო გაუქმდა.

დაჯილდოებაზე მონაწილეობა მაილი საირუსს, ტეილორ სვიფტსა და სხვა ვარსკვლავებს უნდა მიეღოთ, თუმცა MTV-მ ცოტა ხნის წინ განცხადება გაავრცელა, რომ უსაფრთხოების მიზნით, გადაწყვიტეს, ღონისძიება გააუქმონ. ხმის მიცემა 31 ოქტომბრამდე კვლავაც გრძელდება და გამარჯვებულებს ჯილდო გადაეცემათ, თუმცა ღონისძიება ფიზიკურ სივრცეში არ შედგება.

"MTV EMAs გლობალური მუსიკის ზეიმია, იმის ფონზე კი, რა საშინელებაც ისრაელსა და ღაზაში ტრიალებს, ახლა გლობალური ზეიმის დრო არაა. ათასობით ადამიანის დაღუპვის შემდეგ, ახლა გლოვის დროა", — წერს MTV.

7 ოქტომბერს ღაზადან ისრაელის მიმართულებით მასიური სარაკეტო თავდასხმა განხორციელდა, რასაც ასეულობით ადამიანი ემსხვერპლა — მომხდარზე პასუხისმგებლობა ჰამასმა აიღო.

სამხედრო დაჯგუფება თავს დაესხა ღაზა-ისრაელის საზღვრის ნაწილში მიმდინარე მუსიკალურ ფესტივალსაც და ასეულობით ადამიანი დახოცა, ნაწილი კი მძევლად აიყვანა. ისრაელმა კონტრშეტევა დაიწყო, რასაც ასევე ასეულობით პალესტინელი ემსხვერპლა.