იუნესკო საკლასო ოთახებში სმარტფონების აკრძალვისკენ სკოლებს მოუწოდებს. გაეროს ანგარიშის მიხედვით, სმარტფონების აკრძალვა ხელს შეუშლის საგაკვეთილო პროცესის შეფერხებას, გააუმჯობესებს სწავლის ხარისხს და ბავშვებს კიბერბულინგისგანაც დაიცავს.

იუნესკოს განცხადებით, არსებობს რამდენიმე კვლევა, რომელთა მიხედვითაც, მოსწავლის მიერ სმარტფონის ხანგრძლივად გამოყენება სასწავლო მასალის ათვისების უნარებს აქვეითებს. გარდა ამისა, ეკრანთან დიდი დროის გატარება ბავშვების ემოციურ სტაბილურობაზე უარყოფითად მოქმედებს.

როგორც იუნესკო განმარტავს, ციფრული ტექნოლოგიები და მათ შორის, ხელოვნური ინტელექტიც, უნდა იყოს სწავლების ხელშემწყობი ელემენტი და არ უნდა განიხილებოდეს მასწავლებელთან პირისპირ ურთიერთობის ჩანაცვლების საშუალებად.

მას შემდეგ, რაც სწავლება დიდწილად ონლაინ რეჟიმში გადავიდა, განსაკუთრებით კი უნივერსიტეტებში, იუნესკო სახელმწიფოებს მოუწოდებს, რომ განათლების "სოციალური განზომილება" არ უნდა უგულებელყონ. "ყველა ცვლილება არ ნიშნავს პროგრესს. მხოლოდ იმიტომ, რომ რაღაც შეიძლება გაკეთდეს, არ ნიშნავს, რომ უნდა გაკეთდეს", — ნათქვამია იუნესკოს განცხადებაში.

იუნესკოს განცხადებით, ქვეყნებს მკაფიო მიზნები და პრინციპები უნდა ჰქონდეთ ჩამოყალიბებული, რათა განათლებაში ციფრული ტექნოლოგიების გამოყენებით სარგებელი მიიღონ და ზიანი თავიდან აიცილონ. მოთხოვნებთან ერთად იუნესკომ წარმოადგინა სტატისტიკაც, რომლის მიხედვითაც, ციფრული ტექნოლოგიების გადაჭარბებით გამოყენებასა და სტუდენტების სწავლის ხარისხს შორის უარყოფითი კავშირია.