მცხეთაში "სამხედროს ქუჩას" სრულიად საქართველოს კათოლიკოს-პატრიარქის, ილია მეორის სახელი ეწოდა. გადაწყვეტილება 31 აგვისტოს მცხეთის მუნიციპალიტეტის საკრებულომ მიიღო.

მათ მიერ გავრცელებული ინფორმაციის თანახმად, გარდაცვლილი პატრიარქის სახელი ერთ-ერთ ქუჩას, მოსახლეობის მომართვის საფუძველზე მიეცა.

"საკრებულომ იმსჯელა და მიიღო დადებითი გადაწყვეტილება, მოსახლეობის მომართვის საფუძველზე ქალაქ მცხეთაში მდებარე ერთ-ერთი ცენტრალური ქუჩისათვის ("სამხედროს ქუჩა") ისტორიულ ვითარებათა და სხვა ობიექტური გარემოებების გამო, სახელის გადარქმევისა და აღნიშნული გეოგრაფიული ობიექტისათვის საზოგადო და სასულიერო მოღვაწის , სრულიად საქართველოს კათოლიკოს პატრიარქის, მცხეთა-თბილისის მთავარეპისკოპოსის, ბიჭვინთისა და ცხუმ-აფხაზეთის მიტროპოლიტის უწმინდესისა და უნეტარესის "ილია მეორე"-ს სახელის მინიჭების თაობაზე", — ნათქვამია მცხეთის მუნიციპალიტეტის საკრებულოს მიერ გავრცელებულ ინფორმაციაში.

რაც შეეხება ქუჩის მდებარეობას, ამ ქუჩაზე ან მის სიახლოვეს რამდენიმე მნიშვნელოვანი ობიექტია, მათ შორის — მცხეთის რაიონული სასამართლო (ყოფილ "სამხედროს ქუჩა" №17-ში), მცხეთის სპორტულ-გამაჯანსაღებელი კომპლექსი (ყოფილ "სამხედროს ქუჩა" №9-ში) და ბებრის ციხე (ქუჩის ბოლოში, ჩრდილოეთ ნაწილში).

სვეტიცხოვლის საკათედრო ტაძრიდან ყოფილ სამხედროს, ახლანდელ ილია მეორის ქუჩამდე მანძილი 3 კილომეტრამდეა, ფეხით მისასვლელად დაახლოებით 30-40 წუთი იქნება საჭირო.

საქართველოს 141-ე პატრიარქი ილია მეორე 2026 წლის 17 მარტს 93 წლის ასაკში გარდაიცვალა.