აშშ-ის ელჩის მოვალეობის შემსრულებელი ემი დიაზი გასულ კვირას ლუგარის ცენტრს ეწვია, რომელიც საზოგადოებრივი ჯანდაცვის სფეროში აშშ-საქართველოს თანამშრომლობის ერთ-ერთი საუკეთესო მაგალითია. ამის შესახებ ინფორმაციას საქართველოში აშშ-ს საელჩო ავრცელებს.

"აშშ-ის მხარდაჭერით აშენებული და აღჭურვილი ლუგარის ცენტრი 20 ბიოლაბორატორიისგან შემდგარი ქსელის ნაწილია, რომელიც შეერთებულმა შტატებმა საქართველოსთან პარტნიორობით შექმნა და 2015 წელს სრულად გადასცა საქართველოს მთავრობას. დღეს მას საქართველოს ჯანდაცვის სამინისტრო მართავს და ის მნიშვნელოვან როლს ასრულებს ინფექციური დაავადებების გამოვლენასა და მონიტორინგში. ასევე, ხელს უწყობს ქართველი სტუდენტებისა და მეცნიერების პროფესიულ განვითარებას.

ვიზიტის ფარგლებში ემი დიაზი შეხვდა ლუგარის ცენტრის, უოლტერ რიდის არმიის კვლევითი ინსტიტუტისა (WRAIR) და აშშ-ის დაავადებათა კონტროლისა და პრევენციის ცენტრების (CDC) თანამშრომლებს, რათა გასცნობოდა მათ მნიშვნელოვან საქმიანობას საქართველოში საზოგადოებრივი ჯანმრთელობის დაცვის მიმართულებით. ვიზიტისას განსაკუთრებული ყურადღება დაეთმო ინფექციური დაავადებების მონიტორინგს როგორც საქართველოში, ისე რეგიონში. მათი საქმიანობა ხელს უწყობს საფრთხეების დროულად გამოვლენას და აშშ-ის მთავრობისა და მისი პარტნიორების, მათ შორის საქართველოს თავდაცვის ძალებისა და დაავადებათა კონტროლისა და საზოგადოებრივი ჯანმრთელობის ეროვნული ცენტრის ინფორმირებას, რაც თითოეული ჩვენგანის უსაფრთხოების დაცვას ემსახურება", — წერს საელჩო.