პარლამენტის ვიცე-სპიკერი ნინო წილოსანი ექსპრემიერ ირაკლი ღარიბაშვილის მიერ ციხიდან გამოგზავნილ წერილს ეხმაურება, სადაც ის უფლებადამცველ ლაზარე ქარჩხაძის თვითმკვლელობაზე საუბრობს. წილოსანი ავითარებს აზრს, რომ ექსპრემიერი პარტია ახალის ლიდერი, ნიკა გვარამიას წაქეზებით მოქმედებს.

"მისმა [ირაკლი ღარიბაშვილის] განცხადებებმა მხოლოდ ნაცმოძრაობის აქტივი ააჟრიამულა. პროკურატურის მხრიდან მოგვეწოდა ინფორმაცია, რომ ოჯახის წევრები, ახლობლები და ყველა არსებული მტკიცებულება მიდის ერთ დასკვნამდე, რომ ეს იყო თვითმკვლელობა. როგორც ჩანს, ვიღაცისთვის ეს არის ხელსაყრელი მომენტი, გარკვეული პოლიტიკური დაზიანება მიაყენოს და დისკრედიტაცია გაუკეთოს როგორც პროკურატურას, ისე მთლიანად ხელისუფლებას. უზომოდ სამწუხაროა, რომ ღარიბაშვილის პოსტმა მხოლოდ „ნაცმოძრაობის“ აქტივისტებსა და ისეთ დეზინფორმატორებში ნახა გამოხმაურება, როგორებიც გვარამია, ჟორჟოლიანი და მათი თანამოაზრეები არიან. როგორც ჩანს, ახლა ერთ თამაშს თამაშობენ. რაც მთავარია, ნიკა გვარამია ღარიბაშვილს აგულიანებდა — ატკინე, დააზიანე მაინცო. ალბათ, ამ ხაზის გაგრძელება იყო ეს პოსტიც და შემდგომი პოსტებიც. სამწუხაროა, რომ ჩვენი ყოფილი თანაგუნდელი გვარამიას რჩევებს აჰყვა. იმის მიუხედავად, რაოდენ ნაწყენიც ან გაბრაზებულიც არ უნდა იყოს თავისი გადმოსახედიდან, ჩემთვის მაინც მიუღებელია, რომ ვინმე "ნაცმოძრაობის" ნარატივზე დაჯდეს", – განაცხადა ნინო წილოსანმა ("პირველი არხი").

ნინო წილოსანი სავარაუდოდ გულისხმობს პარტია ახალის ლიდერის, ნიკა გვარამიას 24 აგვისტოს გამოქვეყნებულ ფეისბუქ-პოსტს, რომელშიც ის ექსპრემიერ ღარიბაშვილს მიმართავს, ბოლომდე ამხილოს ბიძინა ივანიშვილი.

"თუ არ აჯანყდები, ატკინე მაინც. თუ ვერ დაამარცხებ, დაასუსტე მაინც. სიმართლე თქვი! თუ მხილების და სამართლიანობის სახელით არა, მტრის გასამწარებლად და დასასუსტებლად მაინც. მოძალადის ტყვეობაში მაინც ნუ იქნები მისი მონა", — წერს გვარამია.