წინა ფლაგმანური სერიის (GPT-5.6 Sol, Terra და Luna) გამოსვლიდან ორ თვეზე ნაკლებ დროში OpenAI-მ ახალი სისტემა, GPT-6 Astra წარადგინა. კომპანიის განცხადებით, ეს მსოფლიოში ყველაზე გონიერი და ადამიანის ნებასთან მორგებული მოდელია.

ცნობისთვის, აგვისტოში OpenAI-მ განვითარების ტემპი დროებით შეანელა, რადგან წინა პერიოდში ერთ-ერთმა მოდელმა პლატფორმა Hugging Face გატეხა. სავარაუდოა, რომ უახლოეს პერიოდში OpenAI ამ მასშტაბის ახალ მოდელს აღარ გამოუშვებს.

ასევე იხილეთ: OpenAI ახალი AI მოდელისთვის უსაფრთხოების ზომებს ამკაცრებს — ამდენად მძლავრია Astra?

ახალი მოდელი განსაკუთრებით ეფექტიანია კომპიუტერული და ბრაუზერში სამუშაო დავალებების, პროგრამული უზრუნველყოფის, კიბერუსაფრთხოებისა და სამეცნიერო პროექტების შესრულებისას. სადემონსტრაციო ვიდეო აჩვენებს, რომ Astra მომხმარებლის მრავალსაფეხურიან ამოცანებს ავტონომიურად მართავს. მაგალითად, ის პარალელურ რეჟიმში პროგრამულ კოდსაც წერს და სხვადასხვა ონლაინსერვისსაც აკონტროლებს. OpenAI-ის ცნობით, მოდელი ეკრანზე არსებულ ვიზუალურ ინფორმაციას ზუსტად აანალიზებს და რთულ დავალებებს საწყისი ინსტრუქციებიდან გადახვევის გარეშე ასრულებს.

Astra-ს გაუმჯობესებულ შესაძლებლობებს ახალი ტესტირების შედეგები ადასტურებს. უცნობი პრობლემების გადაჭრის ინდუსტრიულ სტანდარტში (ARC-AGI-3) მოდელმა 98.6%-იანი მაჩვენებელი დააფიქსირა, კოდირებისა და ავტონომიური აგენტების ტესტებში კი წინა ფლაგმან მოდელს მნიშვნელოვნად აჯობა.

ახალი სისტემა განსაკუთრებულ უნარებს ავლენს კიბერუსაფრთხოებაში. პროგრამული ხარვეზების ბოროტად გამოყენების ტესტში (ExploitBench) მან აბსოლუტური, 100%-იანი, შედეგი აჩვენა, როცა GPT-5.6 Sol-ს მაჩვენებელი 78.5% იყო. ამასთანავე, პირველ მცდელობაზე პროგრამული უზრუნველყოფის საწყისი კოდის გარეშე აღდგენის (SRE-Bench) დავალებების 88% შეასრულა, ხოლო ოთხი მცდელობით კი — 99.2%. GPT-5.6 Sol-ის შედეგები ამ მხრივ 55.9% და 68.7% იყო.

კიბერუსაფრთხოების მიმართულებით ამხელა შესაძლებლობების მიუხედავად, მოდელს გაუმჯობესებული უსაფრთხოების მექანიზმები იცავს. OpenAI-ის განმარტებით, სისტემა ისეა აგებული, რომ მავნებლური კიბერდავალებების შესრულებაზე უარი თქვას. გაძლიერებული დაცვა Astra-ს ე. წ. "ჯეილბრეიქის" (Jailbreak — სისტემური შეზღუდვების გვერდის ავლა) მცდელობებისგან იცავს და კომპანიას ბოროტად გამოყენების მონიტორინგს უმარტივებს.

GPT-6 Astra შეზღუდული რაოდენობის ორგანიზაციებისთვის უკვე ხელმისაწვდომია, უახლოეს დღეებში კი მას ChatGPT-ის პრემიუმსერვისების (Plus, Pro, Business და Enterprise) მომხმარებლებიც მიიღებენ. იგი ასევე დაინერგება API-სა და AWS-ში.

დეველოპერებისთვის მილიონი შემომავალი ტოკენის ფასი 10 ამერიკული დოლარია, გამომავლის კი — $50. შესაბამისად, Astra ერთ-ერთი ყველაზე ძვირადღირებული მოდელია. ხარჯებთან დაკავშირებით OpenAI-ის პრეზიდენტი, გრეგ ბროკმანი, მიიჩნევს, რომ ბიზნესისთვის მთავარი საზომი არა ტოკენების, არამედ შესრულებული დავალების ფასი უნდა იყოს.

"მთავარი კითხვა ასეთია: შეუძლია თუ არა მოდელს საქმის შესაბამის ფასად და შესაბამის დროში შესრულება?" — აღნიშნავს ბროკმანი.