რატომ არის მნიშვნელოვანი: ინფორმაცია, რომ პირი Tik-Tok-ზე სატრანსპორტო პოლიტიკის გაკრიტიკების გამო სამართალდამღვევად ცნეს და 2 000 ლარით დააჯარიმეს, საიამ გაავრცელა.

  • ორგანიზაციის ცნობით, ვიდეოს ავტორი თბილისის სატრანსპორტო პოლიტიკის გამო მწვავე პროტესტს გამოხატავდა — აკრიტიკებდა იმ ადამიანებს, რომლებიც სამსახურებრივ უფლებამოსილებას ბოროტად იყენებენ და პრივილეგირებული მდგომარეობით სარგებლობენ.
  • ასევე, ლანძღავდა იმ პოლიციელებს, რომლებიც შერჩევითად აჯარიმებენ მოქალაქეებს, ხოლო სახელმწიფო უწყებების თანამშრომლებსა და მათთან დაახლოებულ პირებს დარღვევაზე პასუხს არ სთხოვენ.

მერიის მტკიცებით, ტყუილია, რომ კურიერი სასამართლომ სოციალურ ქსელში მერის სიტყვიერი შეურაცხყოფის გამო დააჯარიმა და ეს საზოგადოების დეზინფორმირებას ემსახურება.

  • ამბობენ, რომ ერთი პირის მიმართ გასული წლის 6 დეკემბერს განხორციელდა ადმინისტრაციული სამართალწარმოება 166-ე და 173-ე მუხლებით.
  • ეს საჯარო სივრცეში ლანძღვა-გინებას და სამართალდამცავი ორგანოს თანამშრომლებისადმი დაუმორჩილებლობას გულისხმობს და ჯარიმაც სასამართლომ შესაბამისად განუსაზღვრა.
  • "აქედან გამომდინარე, ხაზგასმა, თითქოს ახალგაზრდა დაჯარიმდა მხოლოდ და მხოლოდ თბილისის მერის მისამართით გამოთქმული უცენზურო სიტყვების გამო, არის სრული ტყუილი, კონკრეტული მედიის მიერ აგორებული მორიგი პროვოკაცია და კახა კალაძის რეპუტაციის შელახვის მცდელობა".
  • ბოლოს კი ამბობენ, რომ "ცილისწამება დანაშაულია, რომელიც კანონის შესაბამისად ისჯება".
  • On.ge დეტალების დასაზუსტებლად საქალაქო სასამართლოს დაუკავშირდა, სადაც წერილობით მიმართვა მოგვთხოვეს. ვებგვერდზე განთავსებული ინფორმაციის თანახმად, პასუხს არაუგვიანეს 10 დღეში მივიღებთ.