რა მოხდა: გლობალური მაკდონალდსის კამპანიის ფარგლებში მაკდონალდსმა ელტონ ჯონსა და არეტა ფრანკლინზე წიგნი გამოუშვა, რომელიც Happy Meal-ის სასაჩუქრე მენიუს მოჰყვებოდა.

  • ელტონ ჯონის ბიოგრაფიაში ეწერა, რომ "დაქორწინდა და მეუღლესთან, დევიდთან და ორ ვაჟთან ერთად შექმნა ოჯახი, რომელზეც ყოველთვის ოცნებობდა".
  • ამის შემდეგ კომპანიის წინააღმდეგ მადისკრედიტირებელი კამპანია დაიწყო, რომელსაც სათავეში ქართული ოცნება და პროსახელისუფლებო არხები ედგა —ისინი მაკდონალდს ბავშვებში "ლგბტ პროპაგანდის გავრცელებაში" ადანაშაულებდნენ.
  • მაგალითად, ქართული ოცნების დეპუტატი, მამუკა მდინარაძე ამტკიცებდა, თითქოს ბავშვებს "ლგბტ პროპაგანდის შემცველ დოკუმენტაციას აწვდიან" და ამას "ამაზრზენი ფაქტი" უწოდა.
  • "ეს აღმაშფოთებელია, უბრალოდ კატასტროფაა! ბავშვებთან ლგბტ პროპაგანდის ჩატარება გამაოგნებელია", — ამბობდა კიდევ ერთი დეპუტატი, ირაკლი კობახიძე.

მაკდონალდსის პირველი პოსტი: დღეს კომპანიამ დაწერა, რომ ინფორმაცია, თითქოს რაიმე სახის პროპაგანდას ეწევიან, საზოგადოების შეცდომაში შეყვანას ემსახურება მიზნად.

  • ამბობდნენ, რომ მაკდონალდს გლობალის შემეცნებით-საგანმანათლებლო პროგრამის, Happy Meal Reader-ის, ერთადერთი მიზანი ბავშვებისთვის წარმატების მიღწევის მოტივაციის მიცემაა.
  • თავს იმართლებდნენ, "დაშვებული შეცდომისთვის" ბოდიშს იხდიდნენ და წერდნენ, რომ გამოცემა ლიცენზირებულია, რაც თარგმნისას შინაარსის რამე სახით შეცვლას კრძალავს.
  • ამბობდნენ, რომ ორიგინალი ვერსიის ქართულად თარგმნისას და რედაქტირებისას "ჯეროვნად არ იქნა გათვალისწინებული კონტექსტი და მოხდა შინაარსის პირდაპირ და უხეშად კოპირება".
  • მეტიც, ამას სამწუხაროს უწოდებდნენ და მაკდონალდს საქართველოს აღმასრულებელი გუნდის შეცდომაზე საუბრობდნენ.
  • ამბობდნენ, რომ პროცესის შინაარსობრივ ნაწილში არ მონაწილეობდნენ არც კომპანია კოკა-კოლა და არც თემურ ჭყონია.

ახალი პოსტი: ძველი პოსტის წაშლის შემდეგ, მაკდონალდსი მრავალფეროვნებაზე ალაპარაკდა და ამჯერად წინა განცხადების "ბუნდოვანების" გამო იხდის ბოდიშს.

  • ყველას მოუწოდებენ, თავი შეიკავონ საზოგადოების შეცდომაში შეყვანისგან და ბრალდებისგან, თითქოს რაიმე სახის პროპაგანდას ეწევიან.
  • "ადამიანების ძალა არის მრავალფეროვნებაში. სამწუხაროა, როდესაც პროპაგანდა იყენებს ადამიანების სქესსა თუ ორიენტაციას მათი დისკრედიტაციისთვის, ამახინჯებს კონტექსტს და ხელს უწყობს ჩაგრულთა კიდევ უფრო ჩაგვრას", — წერენ ისინი.