რატომ არის მნიშვნელოვანი: ინტერვიუში საუბარია, თუ რატომ არ ჩასულა სალომე ზურაბიშვილი უკრაინაში მას შემდეგ, რაც ომი დაიწყო, ასევ ორმხრივ ურთიერთობებსა და მზადყოფნაზე — არის თუ არა საქართველო მზად, სამხედრო საშუალებების გამოყენებით დაიბრუნოს რუსეთის მიერ ოკუპირებული ტერიტორიები.

• ასევე რუსეთისა და საქართველოს ურთიერთობებსა და სანქციებზე.
• პრეზიდენტი საუბარს იწყებს იმით, რომ საქართველოსა და უკრაინას დიდი ხნის ურთიერთობა აკავშირებთ, გარდა ამისა, ორ ქვეყანას გავლილი აქვს ერთი და იგივე მოვლენები.
• რაც, მისი თქმით, თავის მხრივ, ქმნის უამრავ ურთიერთგაგების მიზეზს.

დეტალები: ჟურნალისტი მას ეკითხება, თუ რატომ არ ჩავიდა უკრაინაში საქართველოს პრეზიდენტი სოლიდარობის ნიშნად, იმის ფონზე, რომ იქ ბევრი დასავლელი ლიდერი იმყოფებოდა ომის დაწყების შემდეგ.

• ზურაბიშვილი პასუხობს, რომ ის ყოველთვის მზადაა უკრაინაში ჩასასვლელად.
• "ასე რომ, თუ გადასცემთ ჩემს გზავნილს, შემიძლია ხვალვე ჩამოვიდე", — ამბობს ის.
• კითხვაზე, თუ რატომ არ მიიწვია ის ზელენსკიმ, ამბობს, რომ ეს "მისდამი პიროვნული დამოკიდებულება არაა, უბრალოდ ეს ის არის, რასაც ამ ეტაპზე სამთავრობო წრეებს შორის არც თუ ისე დამაკმაყოფილებელ ურთიერთობებს ეძახიან."
• "მზად ვარ [ჩასასვლელად]. დარწმუნებული ვარ, რომ ჩვენ ასეთი შესაძლებლობა გვექნება. იმედი მაქვს, რომ ასეთი შესაძლებლობა ყირიმის პლატფორმაზე მოგვეცემა. ყირიმის პლატფორმაზე დასასწრებად მოწვევა ჯერ არ მიმიღია. ვფიქრობ, რომ ეს ჯერ ორგანიზებული არაა", — თქვა ზურაბიშვილმა.
• ჟურნალისტი ზურაბიშვილს საქართველოსა და რუსეთს შორის "ურთიერთობების დათბობაზეც" ეკითხება და მაგალითად რუსული ავიაკომპანია მოჰყავს, რომელიც ფრენებს ოკუპირებულ ყირიმშიც ასრულებს.
• პრეზიდენტს ეკითხებიან, მიაჩნია თუ არა ეს არა მხოლოდ უკრაინის, არამედ საქართველოს ღალატად, სადაც ტერიტორიების ნაწილი რუსების მიერაა ოკუპირებული.
• ზურაბიშვილი პასუხობს, რომ ამ საკითხზე მას დიდი პროტესტი ჰქონდა და განმარტავს, რომ საქართველოს მოქალაქეებისა და მთავრობის პოზიცია ერთმანეთისგან განსხვავდება.
• მისივე თქმით, საქართველო არასოდეს იქნებოდა ასე ახლოს ევროკავშირთან, რომ არა უკრაინელი ხალხის თავდადება და ბრძოლა.
• "ვფიქრობ, ქართველ ხალხს ეს ძალიან კარგად ესმის და ძალიან მადლიერია ამის გამო, რადგან ეს არის გზა, რომელზედაც მან დამოუკიდებლობის დაწყებისთანავე დაადგა ფეხი", — თქვა ზურაბიშვილმა.

გარდა ამისა ინტერვიუში საუბარია საქართველოსა და რუსეთის ურთიერთობებზე, გავრცელებულ ინფორმაციაზე, რომ შესაძლოა რუსეთთან სარკინიგზო მიმოსვლა აღდგეს — რაც ნიშნავს იმას, რომ აფხაზეთი იქნება ამ მარშრუტის ნაწილი.

• ამაზე ზურაბიშვილი პასუხობს, რომ "რუსებმა მიიღეს, რბილად რომ ვთქვათ, ორაზროვანი სიგნალები საქართველოს ხელისუფლებისგან და ახლა ისინი ცდილობდნენ დაინახონ, რამდენად შორს შეიძლება წავიდნენ."
• ამბობს, რომ ნებისმიერი გადაწყვეტილების ნაკლებობა წაახალისებს რუსეთს — შეეცადოს შეამოწმოს რამდენად შორს შეიძლება წავიდეს.
• განმარტავს, რომ ის წინააღმდეგი იქნება, თუკი რუსეთსა და საქართველოს შორის სარკინიგზო მიმოსვლა აღდგება.
• ჟურნალისტი ამბობს, რომ მას შემდეგ, რაც უკრაინამ დააყენა აფხაზეთისა და სამხრეთ ოსეთის საკითხი, საქართველოს ხელისუფლების ოფიციალური პოზიციაა: "ამ ტერიტორიებს დავიბრუნებთ მშვიდობიანი გზით."
• ჟურნალისტის კითხულობს, თუ როგორ არის ეს შესაძლებელი დღევანდელ ვითარებაში, რადგან მიაჩნია, რომ ეს უბრალოდ განცხადებაა.
• ის ზურაბიშვილს ეკითხება მართალია თუ არა, რომ უკრაინის ხელისუფლების წარმომადგენლები რეალურად სთხოვენ საქართველოს ამით ერთგვარი მეორე ფრონტის გახსნას?
• პრეზიდენტის თქმით, ვისაც რაიმე ესმის სტრატეგიული საკითხების შესახებ, იცის, რომ ამას[მეორე ფრონტს] აზრი არ აქვს.
• ამბობს, რომ როცა უკრაინა გადაწყვეტს, დაჯდეს მოლაპარაკების მაგიდასთან, რათა ომი დასრულდეს — დარწმუნებულია, რომ იმ დროს, მთელი ევროპის ინტერესშია, მოსთხოვოს რუსეთს დატოვოს მთელი ოკუპირებული ტერიტორია.
• განმარტავს, რომ როცა რუსეთი ერთხელ და სამუდამოდ არ აღიარებს, რომ მას არ შეუძლია თავისი მეზობლების ტერიტორიების ოკუპაცია, პატარა თუ დიდი, მაშინ რუსეთი რუსეთად დარჩება.
• ზურაბიშვილის თქმით, რამდენიმე წელში რუსეთი იმავეს კიდევ დაიწყებს, ამიტომ მან უნდა აღიაროს თავისი საზღვრები და იცხოვროს მხოლოდ იქ, სადაც თავისი საზღვრებია.
• მას ტერიტორიების სამხედრო გზით დაბრუნების არ სჯერა.
• ამბობს, რომ არ არსებობს მეორე ფრონტი, რომელიც უკრაინას დაეხმარება.

სალომე ზურაბიშვილი განმარტავს, რომ უკრაინას აქვს ტერიტორიის სიღრმე, აქვს საკუთარი სამხედრო რესურსი და აქვს სრულიად განსხვავებული პოტენციალი.

• "საქართველო, როგორც ქვეყანა, ვფიქრობ, ძალიან მნიშვნელოვანია უკრაინისთვის, რადგან ის არის მოსახლეობა, რომელმაც ეს განიცადა, ესმის და აბსოლუტურ მხარს უჭერს რეალურ უბედურებას, რომელსაც უკრაინა განიცდის", — ამბობს პრეზიდენტი.
• ჟურნალისტი პრეზიდენტს მიხეილ სააკაშვილზეც ეკითხება — ამბობს, რომ ის უკრაინის მოქალაქეცაა და უკრაინის პრეზიდენტმა არაერთხელ მიმართა საქართველოს, რომ ის დაებრუნებინათ, თუმცა ამაზე საქართველო უარს ამბობდა.
• ჟურნალისტი ასევე დაინტერესდა, რატომ არ იწყალებს მას სალომე ზურაბიშვილი.
• სალომე ზურაბიშვილი პასუხობს, რომ ის ანგარიშვალდებულია ხალხის წინაშე და ითვალისწინებს მათ ნებას.
• ამბობს, რომ ეს საკითხი უკრაინისა და საქართველოს ურთიერთობებს "არ გააფუჭებს".
• ნიკა გვარამიას შეწყალების შესახებ ზურაბიშვილი ამბობს, რომ ეს სააკაშვილისგან განსხვავებული სიტუაციაა და პრეზიდენტი ზეწოლის ქვეშ ვერავის შეიწყალებს.
• "ვგრძნობ პასუხისმგებლობას და ვიმოქმედებ. მე ვიღებ სრულ პასუხისმგებლობას და ვიმოქმედებ, როცა გადავწყვეტ, გავაკეთო ან არ გავაკეთო", — თქვა ზურაბიშვილმა.