რატომ არის მნიშვნელოვანი: თბილისის მერიამ უნივერსიტეტის ქუჩის რეაბილიტაცია 10 ივნისს დაიწყო.

  • ქუჩის ერთ მხარეს ტრანსპორტის გადაადგილება დროებით შეზღუდულია.
  • მერიის ცნობით, პროექტის პირველ ეტაპზე, მთლიანად შეიცვლება და განახლდება მიწისქვეშა კომუნიკაციები. მათ შორის, წყალმომარაგების, წყალარინების, სანიაღვრე, გაზმომარაგების და სხვადასხვა საჰაერო ქსელები, რომლებიც მიწისქვეშა კაბელ-არხებში განთავსდება.
  • "1 600 მეტრის სიგრძის გზის სავალ ნაწილზე დაიგება ასფალტის საფარი, მოეწყობა ტროტუარები და გარე განათების ქსელი, დამონტაჟდება ახალი LED ლამპიონები. ტერიტორიაზე, ასევე, ჩატარდება გამწვანების სამუშაოები და ქუჩაზე არსებული ინფრასტრუქტურა ადაპტირდება შშმ პირებისთვის", — აცხადებენ დედაქალაქის მთავრობაში.

დეტალები: კახა კალაძე ამბობს, რომ სამუშაოებს ნოემბერში დაასრულებენ.

  • ის დღეს უნივერსიტეტის ქუჩაზე მოადგილესთან და თბილისის საკრებულოს თავმჯდომარესთან ერთად იმყოფებოდა.
  • მერის თქმით, გზის გარკვეული მონაკვეთები ჩავარდნილია, უნივერსიტეტისა და თამარაშვილის ქუჩების კვეთაზე კი ძლიერი წვიმის დროს წყალი გუბდებოდა — კალაძე ამბობს, რომ რეაბილიტაციის შედეგად სწორედ ეს პრობლემები მოგვარდება.
  • "ასევე, არ არსებობდა ტროტუარები, ფეხით გადაადგილებაც პრობლემას წარმოადგენდა, აღნიშნულ პროექტში კი ეს ყველაფერი გათვალისწინებული იქნება", — თქვა მან.