რატომ არის მნიშვნელოვანი: უკრაინის თავდაცვის მინისტრის მოადგილის, ანა მალიარის ცნობით, უკრაინის შეიარაღებულმა ძალებმა დონეცკის ოლქში რამდენიმე დასახლება ოკუპანტებისგან გაათავისუფლა.

  • მალიარი წერს, რომ ბახმუტის მიმართულებით უკრაინელი სამხედროები აგრძელებენ თავდასხმით მოქმედებებს, ასევე, მიღწევებია ბერხოვის წყალსაცავის რაიონში.
  • "წინ წავიწიეთ 250 მეტრით. სამხრეთით წინსვლაა ორი მიმართულებით, 300-დან 1500 მეტრამდე", — ამბობს მინისტრის მოადგილე.
  • მისივე ცნობით, დეოკუპირებულია ბლაგოდატნესა და მაკარივკის დასახლებული პუნქტები, იმ მიმართულებით კი, სადაც უკრაინელები სამხედროები თავს იცავენ, არც ერთი პოზიცია დაუკარგავთ.

დეტალები: უკრაინული მედიის ცნობით, ოკუპანტებისგან კიდევ ერთი დასახლება დღეს გაათავისუფლეს.

  • თავდაცვის მინისტრის მოადგილისა და 35-ე საზღვარო ბრიგადის კონტრადმირალის, მიხაილო ოსტროგრადსკის განცხადებით, გათავისუფლებული სტოროჟევოე 2022 წლის მარტიდან ოკუპირებული იყო.
  • "დასახლებაში გაწმენდითი ოპერაციის შედეგად ორმოცდაათამდე რაშისტი გაანადგურდა, ოთხი კი ტყვედ აიყვანეს. დღეს სტოროჟოვზე ისევ ფრიალებს ეროვნული დროშა და ასე იქნება ყველა დასახლებაში, სანამ არ გავათავისუფლებთ მთელ უკრაინულ მიწას", — ამბობს ბრიგადის მეთაური.

გარდა ამისა, მედიები ავრცელებენ ინფორმაციას, რომ ოკუპანტებმა დონეცკის ოლქში მდინარე იალიზე კაშხალი ააფეთქეს, რამაც მდინარის ორივე ნაპირზე წყალდიდობა გამოიწვია.

  • უკრაინის ტერიტორიული თავდაცვის ძალების ტავრის მიმართულების წარმომადგენელის, ვალერი შერშენის განცხადებით, კიდევ ერთი კაშხლის აფეთქება არ იმოქმედებს ტაურიდის თავდაცვის ძალების შეტევითი ოპერაციების წარმართვაზე.
  • მისი თქმით, რუსები ცდილობენ, შეანელონ უკრაინის კონტრშეტევა ჰიდრავლიკური კონსტრუქციების აფეთქებით.
  • ამბობს, რომ პირველად ოკუპანტებმა ააფეთქეს კარლოვსკოეს წყალსაცავი, შემდეგ კახოვკას ჰიდროელექტროსადგური, შემდეგ ააფეთქეს სხვა ჰიდრავლიკური ნაგებობები ზაპოროჟიეს რეგიონის ოკუპირებულ ნაწილში.
  • "ჩვენი წინსვლის შენელების მიზნით, მათ მიმართეს ამ ტაქტიკას, როდესაც კვლავ ააფეთქეს ჰიდრავლიკური სტრუქტურა მდინარე მოკრიე იალიზე, მაგრამ ეს არ იმოქმედებს თავდაცვის ძალების წინსვლაზე", — თქვა შერშენმა.