ამის შესახებ მან ჟურნალისტებთან ისაუბრა.

რა მოხდა: ღარიბაშვილმა 30 მაისს მორიგი საერთაშორისო ტრიბუნა ისევ ანტიდასავლური განცხადებების გასაკეთებლად გამოიყენა, რაც დასავლელი პოლიტიკოსების მხრიდან კრიტიკის საგანი გახდა.

  • გლობალური უსაფრთხოების ფორუმზე ქვეყნის პრემიერმინისტრმა რუსეთის მიერ უკრაინაში სრულმასშტაბიანი აგრესიის წამოწყების ერთ-ერთ მიზეზად NATO-ში გაწევრიანების სურვილი დაასახელა.
  • ასევე, არ უპასუხა მკაფიოდ კითხვას, იყო თუ არა აგვისტოს ომი პროვოცირებული, ამის ნაცვლად თქვა, რომ დეტალებზე საუბრისგან თავს შეიკავებს და ქართული ოცნება 2008 წელს ხელისუფლებაში რომ ყოფილიყო, "ამის ასაცილებლად ყველაფერს გააკეთებდა".
  • უსამართლო, დაუსაბუთებელი და არამიზანშეწონილი უწოდა ევროკომისიის გადაწყვეტილებას, საქართველოსთვის კანდიდატი ქვეყნის სტატუსის არმინიჭებაზე, ხოლო "უშველებელი პოლიტიკური შეცდომა" თუ ქვეყანა სტატუსს ისევ ვერ მიიღებს.
  • ღარიბაშვილი დასავლელმა პოლიტიკოსებმა და ექსპერტებმა ანტიდასავლური განცხადებების გამო გააკრიტიკეს.

რატომ არის მნიშვნელოვანი: პრემიერმინისტრის ბრატისლავაში გამოსვლასა და კრემლის ნარატივების გამეორებას საქართველოში პროტესტი მოჰყვა და აქტივისტები რამდენიმე დღის განმავლობაში პარლამენტის წინ იკრიბებოდნენ.

  • რა დროსაც შსს-ს თანამშრომლები უხეშად და გაუმართლებლად ერეოდნენ შეკრებისა და მანიფესტაციის თავისუფლებაში.
  • გავრცელდა კადრები, რომლებშიც ჩანდა, რომ აქტივისტებთან პოლიცია მივიდა, პლაკატები დაუხია და დაკავება დაიწყო.
  • ზოგიერთ აქტივისტს პლაკატზე "ირაყლი" ეწერა, ზოგი კი საერთოდ ცარიელი ფურცლით იდგა, რის გამოც პოლიცია მათ აკავებდა.
  • ამის შემდეგ თბილისის სხვადასხვა უბნებში გამოჩნდა წარწერები "ირაყლი", "ბატონო ბიძინი, ირაყლის მეძახიან".

დეტალები: პრემიერმინისტრმა ჟურნალისტებთან ამ თემაზე და წარწერებზე საუბრისას განაცხადა, რომ "ესაა მარტივი პროვოკაცია, რომელზეც სერიოზულ ადამიანს არ შეიძლება ჰქონდეს კომენტარი".

  • "ჩვენს უსუსურ და მარგინალიზებულ ოპოზიციას თავისი სატელიტებითა და NGO-ებით, დეგრადირებული, ამორალური ხალხით, არაფერი დარჩენიათ, გარდა ერთისა — გადავიდნენ პირად შეურაცხყოფაზე", — თქვა მან.
  • ჟურნალისტის კითხვაზე, სწყინს თუ არა პრემიერმინისტრს ბანერებზე წარწერა "ირაყლი", მან უპასუხა, რომ ეს არ აინტერესებს.
  • მან აქტივისტების დაკავების შესახებ განაცხადა, რომ "ვინც ჩვენი პოლიციის შეურაცხყოფას და პროვოცირებას შეეცდება, ყველა იქნება დასჯილი".