რატომ არის მნიშვნელოვანი: სიუჟეტში, რომელიც დღეს, 2 ივნისს გავიდა, ნინო დობორჯგინიძეს უნივერსიტეტის ბიუჯეტის არამიზნობრივ ხარჯვასა და ნეპოტიზმსა და ნასამართლეობაში ადანაშაულებენ.

  • ტელეკომპანიას ჩაწერილი ჰყავს ერთ-ერთი სტუდენტი, რომელიც რექტორს სთხოვს, გასცეს პასუხი კითხვას, 4 წლის განმავლობაში რა აქტივობებში დაიხარჯა 318 მილიონი ლარი.
  • ასევე, "უარყოს ან დაადასტუროს ფაქტი, არის თუ არა ნასამართლევი".
  • უნივერსიტეტის რექტორმა საპასუხოდ, პოსტი გამოაქვეყნა, სადაც ილიაუნიზე თავდასხმისა და მისი ფსიქოლოგიური განადგურების მცდელობაზე საუბრობს.

დეტალები: ნინო დობორჯგინიძე წერს, რომ 2010 წელს შეემთხვა უმძიმესი ავარია, რომლის დროსაც მისი დისშვილი დაიღუპა.

  • "ამ ამბავმა არა მარტო ჩემი, არამედ მთელი ჩემი ოჯახის, მათ შორის, პატარა ბავშვების ცხოვრება შეცვალა. იმედი მაქვს, ისინი ამ ბინძურ სიუჟეტს ვერ/არ ნახავენ, თვალს აარიდებენ. პირადად მე ამის შეხსენება არ მჭირდება, მე ამაში ვცხოვრობ 2010 წლის აგვისტოდან ყოველ წამს".
  • მისი თქმით, ბოლოს და ბოლოს გაირკვა რეალური მიზეზი, რატომ დაესხნენ თავს ილიას უნივერსიტეტს, რადგან ამის არანაირი ფინანსური საფუძველი არ არსებობდა.
  • "ეს წინასწარი მოსამზადებელი ფაზა იყო ჩემი ფსიქოლოგიური განადგურებისთვის და ამით უნივერსიტეტის, როგორც გამორჩეული ევროპული სივრცის, დაზიანებისთვის".
  • რექტორი წერს, რომ ასეთი თავდასხმა ხელს ვერ შეუშლის, გააგრძელოს თავისი საქმიანობა, როგორც პროფესორმა და როგორც უნივერსიტეტის რექტორმა.