პრინცი ჰარი, მეგან მარკლი და მეგანის დედა ცოტა ხნის წინ პაპარაცების მთავარი სამიზნეები აღმოჩნდნენ. ერთ-ერთი ღონისძიების დასრულების შემდეგ ისინი ავტომობილით სახლში ბრუნდებოდნენ, როცა ჩასაფრებული პაპარაცებიც ავტომობილებით აედევნენ. ჰარისა და მეგანის წარმომადგენლის თქმით, პაპარაცების მიერ წყვილის დევნამ ლამის ავარია გამოიწვია.

პრინცი ჰარისა და მეგან მარკლის დევნა პაპარაცებმა დაახლოებით ორ საათს გააგრძელეს და მათ ავტომობილს არაერთი სახიფათო სიტუაცია შეუქმნეს. როგორც წყვილის წარმომადგენელი ამბობს, პაპარაცები მოძრავი ავტომობილებიდან ფოტოების გადაღებას ცდილობდნენ, რის გამოც არც შუქნიშანს და არც ქვეითებს ყურადღებას არ აქცევდნენ. პოლიციის ცნობით, საბედნიეროდ, არავინ დაშავებულა.

ფოტო: Getty Images

წყვილმა პაპარაცებისგან თავის დახსნა იმით შეძლო, რომ თავი ცოტა ხნით მანჰეტენის პოლიციის განყოფილების შენობას შეაფარა, სადაც პაპარაცებმა შესვლა ვეღარ მოახერხეს. ჰარისა და მეგანის მძღოლის თქმით, მგზავრობის პროცესი შესაძლოა, ფატალური ყოფილიყო ან ვინმე აუცილებლად დაშავებულიყო.

ფოტო: Getty Images

წყვილის ოფიციალურმა წარმომადგენელმა ინციდენტის შესახებ კომენტარი გააკეთა, პაპარაცებს თავშეკავებისკენ მოუწოდა და დასძინა, რომ პრინცი ჰარი და მეგანი ავარიას სასწაულებრივად გადაურჩნენ. წარმომადგენლის თქმით, პრინცი ჰარისა და მეგანის მიმართ საზოგადოების ინტერესი მაღალია, თუმცა ეს სხვისი უსაფრთხოების ფასად არავის უნდა უღირდეს.