უკრაინაში ომის შედეგად დაღუპულ და დაზარალებულ სამოქალაქო პირებზე ინფორმაციას გაეროს ადამიანის უფლებათა უმაღლესი კომისარი, ვოლკერ თურქი ავრცელებს.

რატომ არის მნიშვნელოვანი: გაეროს მონაცემებით, რუსეთის უკრაინაში შეჭრის შედეგად, დაიღუპა სულ მცირე 8 006 მშვიდობიანი მოქალაქე და დაშავდა 13 287.

• ომის შედეგად, დაიღუპა სულ მცირე 487 და დაშავდა 954 ბავშვი.
• ორგანიზაცია ადასტურებს, რომ მათ მიერ გამოქვეყნებული მონაცემები მხოლოდ აისბერგის მწვერვალია, რეალური ზარალი კი გაცილებით დიდია.
• ომს ჰყავს არაპირდაპირი მსხვერპლიც, საკვებისა და საწვავის მაღალმა ფასებმა მსოფლიო მასშტაბით ყველაზე დაუცველი ადამიანები დააზარალა.

დეტალები: გაეროს ანგარიშის მიხედვით, ომმა ყველაზე მეტად ახალგაზრდები და მოხუცები დააზიანა.

• "ხანდაზმულები და შეზღუდული შესაძლებლობის მქონე პირები დიდი გამოწვევების წინაშე დგანან, ზოგიერთ შემთხვევაში ვერ ახერხებენ თავშესაფრებში მისვლას ან სარდაფებში ხანგრძლივი დროის გატარებას მათ ჯანმრთელობის მდგომარეობის გამო", — ნათქვამია მიმოხილვაში.
• მოსახლეობისთვის განსაკუთრებით რთული აღმოჩნდა ელექტროენერგიის და წყლის დეფიციტის ფონზე ზამთრის ცივ თვეებში თავის გატანა.
• "თითქმის 18 მილიონ ადამიანს სჭირდება ჰუმანიტარული დახმარება. დაახლოებით 14 მილიონი ადამიანი იძულებით გადაადგილებულია საკუთარი სახლებიდან", — განაცხადა ვოლკერ თურქმა.

მშვიდობიანი მოსახლეობის მსხვერპლის დაახლოებით 90,3 % გამოწვეული იყო ფართო არეალის მქონე ასაფეთქებელი იარაღით.

• აფეთქებათა უმეტესობა დასახლებულ პუნქტებში მოხდა.
• ომის მიმდინარეობისას, მშვიდობიან მოქალაქეებს ხოცავენ საკუთარ სახლებში მაშინ, როდესაც ოკუპანტები ცდილობენ დაეკმაყოფილებინათ პირველადი საჭიროებები, როგორიცაა წყლის შეგროვება და საკვების ყიდვა.
• 67 წლის ოლჰა, რომელიც ომის დაწყებიდან მეორე დღეს, საკუთარ სახლთან მდებარე მაღაზიაში რძის საყიდლად გავიდა, სარაკეტო დარტყმას ემსხვერპლა.
• 60 წლის კაცმა, სერჰიმ, უფლებადამცველებს უთხრა, რომ 2 აპრილს შეესწრო საარტილერიო თავდასხმას, რომლის შედეგადაც მისმა 6 წლის შვილიშვილმა ფეხი დაკარგა.
• "ოლჰას და სერჰიის მსგავსი ისტორიები ხაზს უსვამს იმ დამანგრეველ ფასს, რომელიც ფრონტის ხაზის ორივე მხარეს სამოქალაქო პირებმა გადაიხადეს და იხდიან", — აცხადებს თურქი.

ევროპარლამენტმა დაამტკიცა რეზოლუცია, რომელიც მხარს უჭერს უკრაინის წინააღმდეგ აგრესიის დანაშაულისთვის სპეციალური ტრიბუნალის შექმნას.

• ევროკავშირის წევრი ქვეყნები შეთანხმდნენ, რომ ჩადენილი ომის დანაშაულებისთვის რუსეთის ხელმძღვანელობას პასუხისმგებლობა უნდა დაეკისროს და ამისთვის სამართლებრივი მექანიზმი უნდა არსებობდეს.