დღეს ღამით უკრაინის ყველა რეგიონში საჰაერო თავდასხმის სიგნალიზაცია გააქტიურდა. აფეთქებები ისმოდა ქვეყნის სხვადასხვა რეგიონში, მათ შორის კიევში, ლვოვში, დნეპროპეტროვსკისა და პოლტავას ოლქებში.

რატომ არის მნიშვნელოვანი: სამხედროების ცნობით, მხოლოდ 15-16 თებერვლის ღამეს რუსეთმა უკრაინას 36 რაკეტა ესროლა, მათგან 16 საჰაერო თავდაცვის სისტემამ ჩამოაგდო.

  • ბრიტანეთის დაზვერვის შეფასებით, რუსებს სამხედრო არსენალში კვლავ მრავლად მოეპოვებათ მოიერიშე თვითმფრინავები, მაგრამ ნაკლებად სავარაუდოა, რომ ამან ომის კურსი მნიშვნელოვნად შეცვალოს.

დეტალები: პრეზიდენტის შტაბის უფროსის, ანდრეი იერმაკის ცნობით, 16 თებერვლის ღამეს რუსეთმა უპილოტო თვითმფრინავებითა და რაკეტებით დაარტყა სამიზნეებს უკრაინის ჩრდილოეთით და დასავლეთით, ასევე დნეპროპეტროვსკისა და კიროვოგრადის ოლქებში.

  • ასევე, რუსებმა გამოიყენეს ყალბი სამიზნეები საჰაერო თავდაცვის მოსატყუებლად.
  • დნეპროპეტროვსკის ოლქის გუბერნატორმა განაცხადა, რომ სარაკეტო თავდასხმას 79 წლის ქალი ესმხვერპლა ქალაქ პავლოჰრადში.
  • მასიური სარაკეტო თავდასხმების შედეგად დაიჭრა 7 მშვიდობიანი მოქალაქე, განადგურდა კერძო სახლები.