ქართული ოცნების თავმჯდომარე, ირაკლი კობახიძე ევროკომისიის პრეზიდენტისთვის CNN-ის ჟურნალისტის მიერ დასმულ კითხვას ვრცელი პოსტით გამოეხმაურა.

რატომ არის მნიშვნელოვანი: The New York Times-ში გამოქვეყნებული სტატია სახელწოდებით, როგორ აღწევს დასავლური საქონელი რუსეთში: სატვირთო მანქანების გრძელი რიგი საქართველოს გავლით.

• მასალაში საუბარი იყო იმაზე, რომ საქონელი, რომლის რუსეთში გატანაც სანქციების გამო იკრძალება, იქ საქართველოდან აღწევს.
• CNN-ის ჟურნალისტმა 18 იანვარს ევროკომისიის პრეზიდენტთან, ურსულა ფონ დერ ლაიენთან ინტერვიუს დროს აღნიშნა, რომ აკრძალული საქონელი რუსეთში მაინც აღწევს, ბოლო ცნობების მიხედვით კი, ეს განსაკუთრებით, საქართველოს გავლით ხდება.
• წამყვანი დაინტერესდა, როგორ უნდა მოხერხდეს ის, რომ სანქციების ქვეშ მყოფმა რუსეთმა ვეღარ მიიღოს ის, რაც სჭირდება.
• პასუხად ლაიენმა განაცხადა, რომ ხედავენ სანქციებზე გვერდის ავლის მცდელობებს და აღნიშნა, რომ ეს მიუღებელია.

პრეზიდენტმა, სალომე ზურაბიშვილმა 20 იანვარს დაწერა, რომ რუსეთთან ფრენების აღდგენას არ მიესალმება.

• "გვჭირდება რეგულაციები — სამუშაო უფლებების, ბიზნესის რეგისტრაციის, საკუთრების შეძენის, თუ რუსულენოვანი სკოლების გახსნის საკითხთან მიმართებაში. ასევე, ფრენების აღდგენის მაგივრად, მთავრობა უნდა ზრუნავდეს ქვეყნის რეპუტაციაზე, კატეგორიულად პასუხობდეს ქვეყნის მიმართ გაჟღერებულ ბრალდებებს საქართველოს გზით სანქციების გვერდის ავლის შესახებ".
• მისი თქმით, ყველაფერი მოითხოვს სერიოზულ სახელმწიფოებრივ მიდგომას და ბრალდებების უარყოფას, რომელიც იქნება კატეგორიული და ფაქტებით გამყარებული.

კობახიძე ამბობს, რომ CNN არ არის რიგითი მედიასაშუალება და მისი შეფასებით, ამ ფაქტიდან კარგად ჩანს "რამდენად მასშტაბურია კოორდინაცია, რომელიც საქართველოს ეროვნული ინტერესების წინააღმდეგ არის მიმართული".

• "შესაბამისად, CNN-ის ჟურნალისტის მიერ გაჟღერებული ყალბი ინფორმაცია მყისიერ რეაგირებას საჭიროებს. საქართველო რუსეთში სანქცირებულ პროდუქციას რომ ატარებდეს, 2022 წელს საქართველოდან რუსეთში ექსპორტი არაპროპორციულად უნდა გაზრდილიყო".
• კობახიძე აღნიშნავს, რომ ყველაფერი სხვაგვარადაა და სინამდვილეში:
• "2022 წელს, 2021 წელთან შედარებით, საქართველოს მთლიანი ექსპორტის ზრდამ 33 პროცენტი შეადგინა, ხოლო იმავე პერიოდში რუსეთში ექსპორტი მხოლოდ 7 პროცენტით გაიზარდა";
• "ანალოგიურ პერიოდში, საქართველოდან ჩინეთში ექსპორტი გაიზარდა 20 პროცენტით, აზერბაიჯანში — 27 პროცენტით, თურქეთში — 35 პროცენტით, აშშ-ში - 36 პროცენტით, ბულგარეთში — 67 პროცენტით, სომხეთში —129 პროცენტით, ხოლო ყაზახეთში — 148 პროცენტით";
• "რუსეთში ექსპორტის წილი საქართველოს საერთო ექსპორტში 2022 წელს არათუ არ გაზრდილა, არამედ მნიშვნელოვნად შემცირდა, რაც CNN-ის ჟურნალისტის მიერ გავრცელებული ინფორმაციის სიყალბეს უტყუარად ადასტურებს".

დეტალები: კობახიძე წერს იმასაც, რომ საქართველოდან შეტანილი საქონელი რუსეთის 2022 წლის საერთო იმპორტის მხოლოდ 0,3 პროცენტს შეადგენს.

• "ამ ფონზე, როდესაც კონკრეტული უცხოური მედიასაშუალებები ამტკიცებენ, რომ რუსეთი საქართველოდან შეტანილი საქონლით ითქვამს სულს, რბილად რომ ვთქვათ, ძალიან დიდი ტყუილია";
• "ისიც უნდა აღინიშნოს, რომ 2022 წელს საქართველოდან რუსეთში გატანილი საქონლის 3/4-ზე მეტი ალკოჰოლურმა და არაალკოჰოლურმა სასმელებმა, სოფლის მეურნეობის პროდუქციამ და ფეროშენადნობებმა შეადგინა".

გარდა ამისა, კობახიძე მხოლოდ საქართველოს შესახებ ციფრებით არ ისაუბრა და დაწერა: "ვიდრე ჩვენს ქვეყანას რუსეთთან სავაჭრო ურთიერთობების შენარჩუნების გამო კიცხავენ, ევროკავშირის ქვეყნები რუსეთს იმპორტირებულ საქონელში ყოველდღიურად ასეულობით მილიონ ევროს უხდიან".

• კობახიძემ ისაუბრა იმაზე, რომ რამდენიმე ქვეყანაში 2022 წლის თებერვალ-აგვისტოში, 2021 წლის ანალოგიურ პერიოდთან შედარებით, რუსეთიდან იმპორტი გაიზარდა.
• "როცა გავლენიანი უცხოური მედიასაშუალებები ქართული სახელმწიფოს წინააღმდეგ მიმართულ ამ მასშტაბის სიცრუეს ავრცელებენ, ეს ცალკე პრობლემაა. თუმცა, ამაზე დიდი პრობლემაა, როდესაც იგივე სიცრუეს ქართული რადიკალური ოპოზიცია და მისი კუთვნილი მედიასაშუალებებიც ტირაჟირებენ"
• "ეს ფაქტი კიდევ ერთხელ ადასტურებს, რომ ამ ადამიანებისთვის საქართველოს ეროვნული ინტერესები არაფერს ნიშნავს და სინამდვილეში, ისინი არა საქართველოს, არამედ მის მიმართ მტრულად განწყობილი ძალის სამსახურში დგანან".

ამასთან, კობახიძე ფიქრობს, რომ სამწუხაროა, როდესაც ამ "სიცრუის ტირაჟირებაში პრეზიდენტიც აიყოლიეს", რომელმაც ბრალდებებზე კატეგორიული და ფაქტებით გამყარებული პასუხის გაცემა მოითხოვა.

• "ეს არის ჩემი კატეგორიული და ფაქტებით გამყარებული პასუხი ცრუ ბრალდებაზე, რომელიც რუსეთის მიერ ქართული ექსპორტით "სულის მოთქმას" და სანქციების გვერდის ავლას შეეხება".