ცნობილი ინგლისელი მსახიობი და HBO-ის გახმაურებული სერიალის Game Of Thrones-ის ვარსკვლავი, ბელა რემზი, გენდერფლუიდად დაქამინგაუთდა. რემზიმ თავის გენდერულ იდენტობაზე ღიად The New York Times-თან ინტერვიუში ისაუბრა.

გენდერფლუიდი აღნიშნავს ადამიანს, რომლის გენდერული გამოხატვის ფორმა და/ან გენდერული იდენტობა დროთა განმავლობაში იცვლება.

"მგონი, ჩემი გენდერული იდენტობა ყოველთვის ცვალებადი იყო", — აღნიშნავს ახალგაზრდა მსახიობი, — "ვიღაც თუ მდედრობითი სქესის ნაცვალსახელებით (she/her) მომმართავდა, ყურადაც არ ვიღებდი. მაგრამ ვიცოდი, რომ თუკი ვინმე მამრობითი სქესის ნაცვალსახელს (he) მეძახდა, ეს ცოტათი მახარებდა".

რემზის თქმით, საბუთების სქესის გრაფაში იგი "არაბინარულს" უთითებს ხოლმე.

"უბრალოდ, ჩვეულებრივი პიროვნება ვარ. დიდად არ მომწონს, როცა გენდერულად განმსაზღვრავენ. თუმცა, საერთოდ არ მადარდებს, რომელი ნაცვალსახელებით მომიხსენიებენ".

ფოტო: Giphy

როგორც ვთქვით, ბელა რემზიმ ცნობადობა სამეფო კარის თამაშებში მონაწილეობით მოიპოვა. სერიალში იგი ლიანა მორმონტს განასახიერებდა. მოგვიანებით, მსახიობმა მთავარი როლი ითამაშა საბავშვო ფენტეზი სერიალში ყველაზე საშინელი ჯადოქარი (The Worst Witch).

ამჟამად რემზის HBO-ის ახალ პოსტაპოკალიფსურ სერიალში, უკანასკნელი ჩვენგანი (The Last Of Us) შეხვდებით. მისი საპილოტე ეპიზოდის პრემიერა უკვე შედგა 16 იანვარს. სერიალში, რომელიც 2013 წელს გამოსულ ამავე სახელწოდების ვიდეოთამაშს ეფუძნება, ბელა პედრო პასკალთან ერთად თამაშობს.