ბლოგერებმა ვიდეო საკუთარ Youtube-გვერდზე 19 დეკემბერს განათავსეს.

რატომ არის მნიშვნელოვანი: საუბარია კახეთში, საგარეჯოს მუნიციპალიტეტში, ჩაილურის ციხეში გადაღებულ კადრებზე, სადაც ჩანდა, რომ ერთ-ერთი მათგანი ისტორიული ძეგლის კარს ანგრევს.

  • "ხალხო, საქართველოში ვიქირავე არც ისე დიდი აპარტამენტი. ჭიშკარი ძველია, პრინციპში, აი, ასე შეიძლება გაღება", — ამბობს ის და კარს ფეხს ურტყამს.
  • გამოძიება სისხლის სამართლის კოდექსის სსკ-ის 259-ე მე-2 პრიმა მუხლით მიმდინარეობს, რაც კულტურული მემკვიდრეობის დაზიანებას ან განადგურებას გულისხმობს.

ახლა ბლოგერები ამტკიცებენ, რომ არავის შეურაცხყოფა არ სურდათ, "ეს იყო შეცდომა" და მომხდარის გამო ბოდიშს იხდიან. ამტკიცებენ იმასაც, რომ საქართველო ძალიან უყვართ და ქართველ ხალხს და კულტურას პატივს სცემენ.

  • მათი თქმით, კახეთში ვიდეორგოლის გადასაღებად მიდიოდნენ, ციხე ნახეს, რომელიც მიტოვებულს ჰგავდა, შიგნით კი ცხოველთა ფეკალიები იყო.
  • რაც შეეხება კარს, ამბობენ, რომ ის ჩამოვარდნილი იყო და ვიდეოს გადასაღებად მიაყუდეს.
  • ერთ-ერთი ბლოგერის თქმით, მეგობარს მისი შეშინება სურდა და სწორედ ამიტომ კარზე დაკაკუნების ნაცვლად, მას ფეხი ჰკრა.
  • როგორც ის აღნიშნავს, როცა პოლიციამ ადგილზე გამოკითხვაზე მიიყვანა, უთხრა, რომ ციხე გაქირავებულია და მეპატრონე არ უვლის. მისივე თქმით, ვიდეოს გავრცელების შემდეგ კარი დაამაგრეს.
  • "გამოდის, რომ ჩვენი ცუდი საქმით, ცოტათი კარგი რამ გავაკეთეთ. ბოდიში, ასე არ ხდება, მაგრამ ახლა კარი მაინც დამაგრდა და ხედავთ, აღარ ვარდება", — ასე ცდილობს ის თავისი საქციელის გამართლებას.

მეორე ბლოგერი კი ქმედებას "სულელურ თამაშს" უწოდებს. მისი თქმით, კარზე უნდა დაეკაკუნებინა, მაგრამ ბოლო მომენტში გადაწყვიტა, რომ კარს ფეხით მისწოლოდა და მეორე მხარეს მყოფს მისი შეკავება გასჭირვებოდა.

  • როგორც ის აღნიშნავს, არ ეგონა თუ კარი, რომელიც დამაგრებული არ იყო, ისტორიულ მემკვიდრეობას წარმოადგენდა.
  • შემდეგ კი ამბობს, რომ იმ მედიების "მსხვერპლები გახდნენ, რომლებიც სიმართლეს ცვლიან და ინფორმაციას ამახინჯებენ".
  • "სანამ დასკვნას გააკეთებდეთ, გთხოვთ, შეისწავლოთ ინფორმაცია. კიდევ ერთხელ ძალიან დიდ ბოდიშს ვიხდით ამ საქციელის გამო", — ნათქვამია ბლოგერის ვიდეოში.