ყოფილი მაღალჩინოსნები ექსპრეზიდენტ მიხეილ სააკაშვილზე საერთო განცხადებას ავრცელებენ. მათ შორის მოქმედი პოლიტიკოსებიც არიან.

რატომ არის მნიშვნელოვანი: სააკაშვილის ოჯახის წევრები, ექიმები და ადვოკატები ექსპრეზიდენტის ჯანმრთელობის მდგომარეობის მკვეთრ გაუარესებაზე საუბრობენ და საზღვარგარეთ მის სამკურნალოდ გადაყვანას ითხოვენ.

  • ყოფილი პრეზიდენტის ჯანმრთელობის მდგომარეობაზე ცენტრ ემპათიის დასკვნაში ნათქვამია, რომ "მოსალოდნელია კომა და სიკვდილი".

დეტალები: ავტორების თქმით, სახალხოდ დამცველის კონსილიუმისა და ამერიკელი სამედიცინო ექსპერტების დასკვნები ადასტურებს, რომ საქართველოში სააკაშვილის სიცოცხლის შენარჩუნება ვერ მოხდება და პროცესი წამებით სიკვდილით დასრულდება.

  • "ჩვენ არ განვიხილავთ პრეზიდენტ სააკაშვილის ბრალეულობის საკითხს. ჩვენ ვამბობთ: კონსტიტუციით სიკვდილით დასჯა აკრძალულია, ისევე როგორც წამება, არაადამიანური და დამამცირებელი მოპყრობა".
  • მათივე თქმით, ვინაიდან სააკაშვილი ხელისუფლების ეფექტური კონტროლის ქვეშა, მისი ღირსების, სიცოცხლისა და ჯანმრთელობის ხელყოფაზე პასუხისმგებლობა სწორედ მას ეკისრება.

გარდა ამისა, ხელმომწერები ხაზს უსვამენ, რომ სააკაშვილის სიკვდილს უაღრესად საზიანო შიდა და გარე პოლიტიკური შედეგები მოჰყვება — ეს არა მხოლოდ გააღრმავებს პოლარიზაციას, ასევე, "მოსპობს უახლოეს მომავალში მისი გადალახვის შანსსაც".

  • "ქართულმა საზოგადოებამ დღემდე ვერ მოიშუშა საქართველოს პირველი პრეზიდენტის ძალადობრივი მოკვდინების ტრავმა".
  • "სააკაშვილის არსებულ მდგომარეობაში დატოვება არის მისი წამებით მოკვდინების აქტი, რაც არის უკანონობა, დანაშაული და საერთაშორისოდ აღიარებული ფუნდამენტური უფლებების უხეში დარღვევა";
  • "რაც შეუქცევადად დააზიანებს ქვეყნის სტაბილურობას, საერთაშორისო იმიჯსა და ჩვენს ისტორიულ პერსპექტივას".

ამიტომ, ყოფილი თანამდებობის პირები წერენ, რომ პოლიტიკური განსხვავებების მიუხედავად, "არ უნდა ჩაგვითრიოს შურისძიების მორევმა".

  • "ჩვენ, საქართველოს მოქალაქეებმა, არ უნდა დავუშვათ პრეზიდენტ მიხეილ სააკაშვილის წამებით სიკვდილი, იგი სასწრაფოდ უნდა გაიგზავნოს სამკურნალოდ უცხოეთში, ეს არის ზეპარტიული მიზანი".
  • "ასეა სწორი ისტორიის, პოლიტიკური მიზანშეწონილობის, ჰუმანიზმისა და ცივილიზებულობის პრინციპებიდან გამომდინარე".

ავტორებს შორის არიან, გიორგი მარგველაშვილი, დავით ბაქრაძე, გედი ფოფხაძე, პაატა ზაქარეიშვილი, ნინო ბურჯანაძე, ეკა ბესელია, უჩა ნანუაშვილი, გიგი წერეთელი, იულონ გაგოშიძე, ლევან ბერძენიშვილი და სხვები.

  • მათი სრული სია შეგიძლიათ იხილოთ აქ.
  • მიუთითებენ, რომ ხელმოწერების შეგროვება გრძელდება და მსურველებს შეუძლიათ შეუერთდნენ.