უკრაინული მედიის ცნობით, უნგრეთის პრემიერმინისტრი "დიდი უნგრეთის" რუკიანი კაშნეთი უნგრეთისა და საბერძნეთის ნაკრებებს შორის ფეხბურთის ამხანაგურ მატჩზე მივიდა.

რატომ არის მნიშვნელოვანი: კაშნეზე გამოსახულ რუკაზე უნგრეთის შემადგენლობაში მეზობელი სახელმწიფოს ნაწილებია მოქცეული, მათ შორის — უკრაინის.

  • ასევე, ევროკავშირის ქვეყნების, ავსტრიის, სლოვაკეთის, რუმინეთისა და ხორვატიის ტერიტორიებიც უნგრეთის შემადგენლობაშია.
  • ეს არ არის პირველი შემთხვევა, როცა ორბანი "დიდი უნგრეთის" თემით აპელირებს.
  • 2020 წელს მან გამოაქვეყნა გლობუსის ფოტო, სადაც, ასევე, ნაჩვენებია უნგრეთის სამეფოს საზღვრები პირველი მსოფლიო ომის დასრულებამდე.
  • 1920 წელს უნგრეთის სამეფომ ტერიტორიის დიდი ნაწილი დაკარგა, რაც ქვეყანაში ჯერ კიდევ დიდ ისტორიულ სირცხვილად ითვლება.

დეტალები: უკრაინსკა პრავდას ცნობით, ინციდენტი კვირას, 20 ნოემბერს მოხდა.

  • რუმინელმა ევროპარლამენტარმა, ალინ მიტუცამ ტვიტერზე დაწერა, რომ ასეთი ქმედებისთვის ევროკავშირის ლიდერებმა ორბანი უნდა დასაჯონ და იზოლაციაში მოაქციონ.
  • "ორბანის კიდევ ერთი უპასუხისმგებლო ქმედება. ეს არის რევიზიონისტული ჟესტი, რომელიც მას აყენებს პუტინის გვერდით, რომელიც, ასევე, ოცნებობს საზღვრების შეცვლაზე", — წერს ევროპარლამენტარი.

მოგვიანებით, უკრაინის საგარეო საქმეთა სამინისტროს პრესსპიკერმა, ოლეგ ნიკოლენკომ დაწერა, რომ უკრაინის საგარეო საქმეთა სამინისტროში უნგრეთის ელჩს დაიბარებენ.

  • "უნგრეთში რევიზიონიზმის იდეების გავრცელება ხელს არ უწყობს უკრაინა-უნგრეთის ურთიერთობების განვითარებას და არ შეესაბამება ევროპული პოლიტიკის პრინციპებს.
  • ველოდებით ოფიციალურ ბოდიშს უნგრეთის მხრიდან და უკრაინის ტერიტორიული მთლიანობის დარღვევის დაგმობას", — აცხადებს ნიკოლენკო.