გასული საუკუნის 90-იანი წლებიდან საინფორმაციო ტექნოლოგიების ცენტრ მზიურში მოქმედებს ნიჭიერ ბავშვებთან მუშაობის პროგრამა, რომლის ფარგლებში გამორჩეული ნიჭით დაჯილდოებულ ბავშვებს არჩევენ და სპეციალურ ჯგუფს აკომპლექტებენ.

ჯგუფის პროგრამა ითვალისწინებს მათემატიკურ-ლოგიკური აზროვნების უნარის განვითარებას, დაპროგრამებისა და ალგორითმიზაციის საფუძვლების გაღრმავებულ შესწავლას.

პროგრამის მთავარი მიზანია მათემატიკურ-ლოგიკური ნიჭით დაჯილდოებული ბავშვების შერჩევა (ძირითადად V-VI კლასის ასაკში) და შემდგომი მომზადება (ძირითადად სკოლის დამთავრებამდე).

ის ბავშვები, რომლებიც ამ ჯგუფს გაივლიან, საერთაშორისო მასშტაბით სრულიად კონკურენტუნარიანები არიან ინფორმატიკის სფეროში და მზად არიან სწავლა გააგრძელონ მსოფლიოს ყველაზე პრესტიჟულ უმაღლეს სასწავლებლებში და მომავალშიც, საკუთარი ადგილი დაიმკვიდრონ ამ სფეროს მეცნიერ-მკვლევართა შორის.

მზიურში სწავლის განმავლობაში, მოსწავლეები მონაწილეობას იღებენ ინფორმატიკისა და მათემატიკის სხვადასხვა რანგის (მათ შორის საერთაშორისო) ოლიმპიადებსა და კონკურსებში და ხშირად აღწევენ წარმატებებს.

პროექტის პირველი თაობის კურსდამთავრებულებს ამჟამად წამყვანი პოზიციები აქვთ საქართველოს წარმატებულ საინფორმაციო ტექნოლოგიების პროფილის კომპანიებში. ბევრი მათგანი კი ისეთ უცხოურ კომპანიებში მუშაობს, როგორიცაა Google, Microsoft, Facebook, Dropbox და სხვა.

ნიჭიერ ბავშვებთან მუშაობის პროგრამა მუდმივად ვითარდება და დღეისათვის იგი ოთხი ძირითადი საფეხურისგან შედგება:

1. მზიურის მათემატიკური ინტერნეტ-შეჯიბრი - მთელი სასწავლო წლის განმავლობაში მიმდინარეობს დაუსწრებელი ტურების სახით ამ საიტზე. მასში მონაწილეობას იღებენ მე-4 და მე-5 (შესაძლებელია მე-3 და მე-6) კლასის მოსწავლეები თბილისისა და სხვა ქალაქების სკოლებიდან. დაუსწრებელი ტურისთვის საიტზე გამოიკიდება ხოლმე 5 მათემატიკურ-ლოგიკური ტიპის ამოცანა, რომლებიც მოსწავლეებმა უნდა ამოხსნან და ამოხსნები ელექტრონული დოკუმენტის სახით გაგზავნონ მითითებულ ვადაში. ინტერნეტშეჯიბრი ერთგვარი დისტანციური სწავლების სკოლაა, რომლის მიზანია ნიჭიერი ბავშვების შერჩევა.
2. მათემატიკური კონკურსი იმედი ხვალის კონკურსი ტრადიციულად იმართება სასწავლო წლის ბოლოს. მასში მონაწილეობას იღებენ თბილისის სკოლების III-VI კლასების ის მოსწავლეები, რომლებიც გამოირჩევიან მათემატიკურ-ლოგიკური აზროვნებით. ეს კონკურსი გარკვეულწილად ინტერნეტშეჯიბრის გაგრძელებაა და მისი ერთგვარი ”დასკვნითი ნაწილია”. კონკურსი შედგება პირველი და მეორე ტურებისაგან და გამარჯვებულთა დაჯილდოების ცერემონიისგან.
3. დაწყებითი ორწლიანი კურსი - ამ პროგრამაში მოსახვედრად თბილისის სკოლების მე-5 და მე-6 (იშვიათად მე-4 და მე-7) კლასის მოსწავლეებმა აუცილებლად უნდა გაიარონ შესარჩევი კონკურსი, რომელიც სასწავლო წლის დასაწყისში იმართება. კონკურსის შედეგების მიხედვით კოპლექტდება სასწავლო ჯგუფები, რომლებიც ორი წლის განმავლობაში სწავლობენ გაძლიერებული პროგრამით. კვირაში მათ აქვთ სამი მეცადინეობა, თითოეული მეცადინეობის ხანგრძლივობა 1 საათი 30 წუთია. ამ მეცადინეობებიდან მხოლოდ ერთი მეცადინეობა ტარდება კომპიუტერულ კლასში, სადაც ეუფლებიან დაპროგრამების საფუძვლებს. დანარჩენი ორი მეცადინეობა კომპიუტერის გარეშეა. ერთ მათგანზე მოსწავლეები სწავლობენ მათემატიკურ-ლოგიკური ამოცანების ამოხსნას, ხოლო მეორეზე ეუფლებიან ალგორითმების საფუძვლებს. სწავლების პროგრამა საკმაოდ დატვირთულია საშინაო დავალებებით და საკონტროლო წერებით. საკონტროლო წერებისა და სხვადასხვა კონკურსებში მონაწილეობის შედეგების მიხედვით ხდება მოსწავლეთა რეგულარული რეიტინგიზაცია, რომელიც საშუალებას გვაძლევს ორწლიანი კურსის დასრულების შემდეგ დავაფორმიროთ ე.წ. საოლიმპიადო და პროგრამირების სკოლის ჯგუფები.
4. საოლიმპიადო და დაპროგრამების ჯგუფები. ამ ჯგუფების მოსწავლეები გაღრმავებულად ეუფლებიან ალგორითმიზაციის საფუძვლებს, საოლიმპიადო ამოცანების ამოხსნის მეთოდებსა და დაპროგრამების ხელოვნებას. პროგრამისტთა სკოლის მოსწავლეები ეუფლებიან დაპროგრამების თანამედროვე ინსტრუმენტებს - C++, G#, Java, ვებგვერდების დაპროგრამების ტექნოლოგიასა და კომპიუტერული თამაშების შექმნის ტექნოლოგიას. ამ კურსის პროგრამა საკმაოდ რთულია და მხოლოდ განსაკუთრებული ნიჭისა და სიბეჯითის მქონე მოსწავლეებისთვის არის დაძლევადი. სწორედ ამ ჯგუფების მოსწავლეები აღწევენ წარმატებებს ინფორმატიკის ოლიმპიადებსა და კონფერენციებში.